Bakı. Dövlət İmtahan Mərkəzi (DİM) iyulun 14-də Azərbaycan Respublikası Müdafiə Nazirliyinin hərbi liseylərinə və Azərbaycan Tibb Universitetinin Hərbi Tibb Məktəbinin feldşer ixtisasına qəbul imtahanı keçirəcək. DİM-dən Trend-ə verilən məlumata görə, imtahan Bakı və Naxçıvan şəhərlərində ümumilikdə 4 binada təşkil olunacaq. İmtahanda 1845 abituriyentin (Bakı şəhərində 1508 nəfər, Naxçıvan şəhərində 337 nəfər) iştirakı nəzərdə tutulur. Onlardan 86 nəfər Hərbi Tibb Məktəbinə, 1759 nəfər isə hərbi liseylərə imtahan verəcək. İmtahanın idarə olunmasına 12 imtahan rəhbəri, 144 nəzarətçi-müəllim cəlb edilib. İmtahan bütün binalarda eyni vaxtda - saat 11:00-da başlayacaq və 2 saat davam edəcək. İmtahanda iştirak etmək üçün ərizə vermiş abituriyentlər DİM-in internet saytına daxil olaraq "İmtahana buraxılış vərəqəsi"ni çap edirlər. Buraxılış vərəqəsi ilə yanaşı onlara "Yaddaş kitabçası"ndan çıxarış da təqdim olunur. Burada abituriyentlərə imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır.