Bakıda sevgilisini öldürən 37 yaşlı kişiyə AĞIR CƏZA


Kriminal 04 İyn 2019 18:27:00 209 0

Bakıda sevgilisini öldürən 37 yaşlı kişiyə AĞIR CƏZA

Bakıda keçmiş arvadını xüsusi amansızlıqla öldürməkdə təqsirli bilinən 1983-cü il təvəllüdlü Xosrov Məmmədovun cinayət işi üzrə məhkəmə başa çatıb.

Son.az Teleqraf.com-a istinadən xəbər verir ki, bu gün Bakı Ağır Cinayətlər Məhkəməsində hakim Cavid Hüseynovun sədrliyi ilə baş tutan prosesdə təqsirləndirilən şəxsə hökm oxunub.

Xosrov Məmmədov 17 il müddətinə azadlıqdan məhrum edilib.

Qeyd edək ki, ötən il oktyabrın 6-da Əmircan qəsəbəsində Xosrov Məmmədov 1985-ci il təvəllüdlü həyat yoldaşı Əfsanə Məmmədovanı bıçaqlayaraq öldürüb. Hadisədən sonra o, polisə təslim olub.

Məlum olub ki, hadisə qısqanclıq zəminində baş verib. Bir il əvvəl Xosrov Məmmədovla Əfsanə Məmmədova rəsmi qaydada boşanıblar. Amma Xosrov Əfsanədən əl çəkməyib və onunla eyni evdə yaşamaq istəyib. Əfsanə isə onun istəyi ilə razılaşmayıb, bir yerdə yaşamaq barədə Xosrovun təklifinə rədd cavabı verib.

Oktyabrın 6-da, səhər saatlarında Xosrov yenidən barışmaq istəyi ilə Əfsanənin yaşadığı ünvana gəlib. Əfsanə Xosrova əhəmiyyət verməyib və azyaşlı qızı ilə birlikdə təmizlik işləri görmək məqsədilə xadimə işlədiyi evə yollanıb.

Xosrov onu arxadan izləyib, həmin ünvana çatana yaxın arxadan Əfsanəyə bir neçə bıçaq zərbəsi vurub.