Milli Paralimpiya Komitəsi Azərbaycan Mətbuat Şurası ilə birgə müsabiqə elan etdi


Digərləri 03 İyn 2019 18:21:00 212 0

Milli Paralimpiya Komitəsi Azərbaycan Mətbuat Şurası ilə birgə müsabiqə elan etdi

Azərbaycan Milli Paralimpiya Komitəsi Azərbaycan Mətbuat Şurası ilə birgə 22 iyul Milli Mətbuat Günü ilə əlaqədar Jurnalist yazıları müsabiqəsini elan edir. 

Müsabiqənin məqsədi Azərbaycan Respublikasında paralimpiya hərəkatı, paralimpiya dəyərlərinin təbliği, əlilliyi olan şəxslərin idman vasitəsi ilə cəmiyyətə inteqrasiya olunması, bu sahənin inkişafı istiqamətində dövlət qurumlarının, o cümlədən özəl şirkətlərin fəaliyyətinin stimullaşdırılması, yuxarıda qeyd olunan sahələrdə əldə olunan mühüm irəliləyişlər barədə ictimai məlumatlandırmanın təmin olunmasında peşəkar jurnalist əməyinin stimullaşdırılmasıdır. 

Jurnalistlər "Əlilliyi olan şəxslərin idman vasitəsilə cəmiyyətə inteqrasiyası", "Əlil idmanına dəstək və Korporativ Sosial Məsuliyyət" kimi mövzularla bağlı yazıları müsabiqəyə təqdim edə bilərlər.  Müsabiqədə ilk yeri qazanan müəllif 1000 manat, ikinci yeri qazanan müəllif 500 manat, üçüncü yeri qazanan iki nəfər isə hər biri 300 manat mükafat, o cümlədən diplomla təltif olunacaq. 

Müsabiqənin mövzuları

Əlilliyi olan şəxslərin idman vasitəsilə cəmiyyətə inteqrasiyası; Əlil idmanına dəstək və Korporativ Sosial Məsuliyyət.

Müsabiqədə iştirak

Müsabiqə elan olunan günədək ən azı bir il müddətində kütləvi informasiya vasitələrində (qəzet, jurnal, informasiya agentliyi və hüquqi şəxs kimi fəaliyyət göstərən internet informasiya saytlarında) fasiləsiz çalışan şəxslər müsabiqədə iştirak edə bilərlər.

Müsabiqəyə təqdim olunan yazılar üçün tələblər

Dərc olunmuş yazının sərlövhəsi təklif olunmuş mövzu ilə eyni olmalıdır; Müsabiqəyə hər jurnalist yalnız bir yazı təqdim edə bilər; İnformasiya agentliklərində, sayt və portallarda çalışan jurnalistlər yazılarını həmin saytlarda yerləşdirməli və linki məqalənin yazıldığı diskdə təqdim etməlidirlər; Yazı son bir ildə, həftədə bir dəfədən az olmayaraq nəşr edilən, Azərbaycan Mətbuat Şurasının tərtib etdiyi "qara siyahı" ya düşməyən mətbuat orqanlarında dərc edilməli, eyni zamanda saytlarda yerləşdirilməlidir;

Aşağıdakı redaksiyaların yazıları müsabiqəyə qəbul edilmir:

Azərbaycan jurnalistlərinin I qurultayında qəbul olunmuş Azərbaycan jurnalistlərinin peşə (etik) davranış qaydalarını pozması ilə əlaqədar haqqında Azərbaycan Mətbuat Şurası tərəfindən müvafiq qərar çıxarılan; Azərbaycan Mətbuat Şurasının tərtib etdiyi "qara siyahı"ya düşən saytlar; Azərbaycan Mətbuat Şurasının tərtib etdiyi "qara siyahı"dan çıxarılan saytlar (1 il müddətində); Azərbaycan Mətbuat Şurası tərəfindən xəbərdarlıq almış saytlar (6 ay müddətində). Dərc olunmuş yazıda "Azərbaycan Respublikası Milli Paralimpiya Komitəsinin Azərbaycan Mətbuat Şurası ilə birgə keçirdiyi müsabiqəyə təqdim edilir" qeydi göstərilməlidir; Yazıların həcmi 9-11 min işarədən çox olmamalıdır.

Yazıların qəbul qaydaları:

Yazının elektron variantı (Times New Roman (12) şriftində - CD diskdə) 1 nüsxə; Yazının A4 formatda çap olunmuş variantı (müəllifin imzası göstərilməməlidir) 3 nüsxə; A4 formatında olan zərfdə;

Tələb olunan sənədlər

Əmək və Əhalinin Sosial Müdafiəsi Nazirliyinin Elektron İnformasiya sistemindən çıxarılmış əmək müqaviləsi bildirişi; İştirakçı haqqında məlumat cədvəli (möhür, müəllif və baş redaktorun imzası ilə); Şəxsiyyət vəsiqəsinin surəti;

Qeyd: İştirakçı haqqında məlumat cədvəli elana əlavə olunur.