Millət vəkili Kamilə Əliyeva "ARB Günəş"in "Mən məktəbli ikən" verilişinin qonağı olub. Son.az xəbər verir ki, o bildirib ki, məktəbi bitirməsinin üzərindən 35 il keçməsinə baxmayaraq, o illəri hələ də unutmur: "Məktəb illəri mənim xatirəmdə böyük izlər buraxıb. Erkən yaşda atamı itirdiyim üçün uşaqlığım, demək olar ki, olmayıb. Tez böyümüşəm. Ailədə mənə anlatmışdılar ki, artıq atan yoxdur. Buna görə də dərslərini yaxşı oxumaq, özünü yaxşı aparmaq lazımdır. Elə bilirdim ki, mən uşaq yox, böyük bir şəxsiyyətəm. 1-ci sinifdən 10-cu sinifədək əlaçı idim. Bir dənə belə 4 qiymətim yox idi. Ərəb dilinə böyük marağım vardı. Uşaq vaxtı kinorejissor olmaq istəyirdim. Anam bu istəyimə mane oldu. O, tibb işçisi idi və mənim həkim olmağımı arzulayırdı". Kamilə Əliyeva müasir dövrün şagirdlərinə öz tövsiyələrini də verib: "İnsanın karyerasının, gələcək fəaliyyətinin əsası məktəbdə qoyulur. Buna görə də uşaqlar bütün dərslərini yaxşı oxumalıdır". Xatırladaq ki, "Mən məktəbli ikən" telelayihəsi hər həftənin şənbə günü axşam saat 18:00-da "ARB Günəş"in efirində yayımlanır.