Son.az AZƏRTAC-a istinadən bildirir ki, ümumrayon tədbiri Novxanı kəndində Sovet İttifaqı Qəhrəmanı, əfsanəvi kəşfiyyatçı Mehdi Hüseynzadənin xatirəsinə ucaldılmış abidənin önünə tər çiçəklər qoyulması ilə başlayıb. Tədbir sonra Xırdalan şəhərində Böyük Vətən müharibəsində həlak olanların xatirəsinə yaradılan abidənin qarşısında davam etdirilib.

Hərbi orkestrin ifa etdiyi vətənpərvərlik ruhunda musiqi sədaları altında keçən tədbirdə bildirilib ki, bəşər tarixinin ən dəhşətli müharibəsində Qələbənin əldə olunmasına Azərbaycan xalqının böyük töhfələri olub. Bu qanlı müharibədə Azərbaycandan 670 mindən çox oğul və qız cəbhəyə yola düşüb, onların təxminən yarısı döyüşlərdə həlak olub.

Qanlı-qadalı döyüşlərdə göstərdikləri igidliyə görə ölkəmizin 130-dan çox vətəndaşı Sovet İttifaqı Qəhrəmanı adına layiq görülüb, 170 mindən çox əsgər və zabitimiz müxtəlif orden və medallarla təltif edilib. Bu igidlərdən arasında adı dillər əzbəri olan abşeronlular Mikayıl Ələkbərov və Mehdi Hüseynzadə də var.

Qeyd edək ki, Abşeron rayonundan 1725 nəfər Böyük Vətən müharibəsində iştirak edib, onlardan yalnız 964 nəfəri geri qayıdıb.