Bakı. Samir Əli - Abşeron Rayon Prokurorluğu aprelin 27-də Masazır qəsəbəsində baş vermiş silahlı insidentlə bağlı məlumat yayıb. Prokurorluqdan Trend-ə verilən məlumatda bildirilir ki, həmin gün saat 16:30 radələrində Abşeron rayonunun Masazır qəsəbəsinin Əliağa Vahid küçəsində fəaliyyət göstərən "Günəş" alqı-satqı ofisinin qarşısında "Yeni Bakı" Yaşayış Kompleksinin komendantı Ehtiram Yusifov şəxsi münasibətlər zəminində həmin ofisdə işləyən Talıbov Məmməd, Qasımov Kamran və Zaur Gəncəliyevə "Vinçester" markalı odlu silahdan atəş açaraq onlara müxtəlif dərəcəli bədən xəsarətləri yetirib. Həmin şəxslər 1 saylı Şəhər Klinik Xəstəxanasına yerləşdiriliblər. Faktla bağlı Abşeron Rayon Prokurorluğunda Cinayət Məcəlləsinin 29,120.2.4-cü (Xüsusi amansızlıqla qəsdən adam öldürməyə cəhd) maddəsi ilə cinayət işi başlanıb, iş üzrə müvafiq ekspertizalar təyin edilib.