AzMİU ilə İstanbul Texniki Universiteti arasında Niyyət Protokolu imzalanıb (FOTO)


Digərləri 22 Apr 2019 15:23:00 202 0

AzMİU ilə İstanbul Texniki Universiteti arasında Niyyət Protokolu imzalanıb (FOTO)

Türkiyənin nüfuzlu İstanbul Texnik Universitetinin rektoru professor Mehmet Karacanın rəhbərlik etdiyi nümayəndə heyəti Azərbaycan Memarlıq və İnşaat Universitetinin qonağı olub.

Bakı. Bu gün Türkiyənin nüfuzlu İstanbul Texnik Universitetinin (İTU) rektoru professor Mehmet Karacanın rəhbərlik etdiyi nümayəndə heyəti Azərbaycan Memarlıq və İnşaat Universitetinin (AzMİU) qonağı olub, rektor Gülçöhrə Məmmədova ilə görüşüblər. Azərbaycan Memarlıq və İnşaat Universitetindən Trend-ə verilən məlumata görə, Türkiyəli alimlər sonra AzMİU-nun Elmi Şurasının növbədənkənar iclasına qatılıb. Qonaqları salamlayan, onları universitetdə görməkdən məmnun olduğunu deyən AzMİU-nun rektoru, professor Gülçöhrə Məmmədova bu günki görüşü rəhbərlik etdiyi universitetin həyatında tarixi gün kimi dəyərləndirib. İTU ilə ikitərəfli əlaqələrin hələ 2002-ci ildən qurulduğunu yada salan rektor bu illər ərzində birgə görüşlərin, müzakirələrin, ikili diplom müqavilələrinin imzalanması istiqamətində ilkin razılaşmaların əldə olunduğunu bildirib. O, 2008-ci ildə AzMİU ilə İTU arasında ikili diplom proqramı üzrə müqavilənin imzalandığını, lakin Türkiyə Respublikasının Yüksək Öyrətim Kurulu tərəfindən razılığın əldə olunmadığını bildirib. Ötən ilin sentyabrında İnşaat mühəndisliyi ixtisası üzrə İkili diplom müqaviləsinin artıq reallaşdığını yada salan professor G.Məmmədova bu günki görüşdə Memarlıq ixtisası üzrə Niyyət protokolunun imzalanacağını Şura üzvlərinin diqqətinə çatdırıb. İTU rektoru, professor Mehmet Karaca da öz növbəsində səmimi qəbul və görüş üçün AzMİU rəhbərliyinə təşəkkürünü bildirib, xoş sözlərini çatdırıb. Rəhbərlik etdiyi universitet barədə geniş məlumat verən rektor İTU-nun beynəlxalq əlaqələrindən, beynəlxalq reytinq cədvəllərində tutduğu yerlərdən də danışıb. O, AzMİU ilə əlaqələrin genişlənməsinə böyük dəyər verildiyini, bu görüşün həmin istiqamətdə gedən müzakirələrin davamı kimi qiymətləndirib.