Bakı. 1949-ci ildən təməli qoyulan Holcim-in Qaradağ Sement Zavodu bu il 70 illik yubileyini təntənəli tədbirlə qeyd edib. “70 illik tarixlə gələcəyə” konsepsiyası altında keçirilən tədbirə, şirkətin əməkdaşlıq etdiyi tərəfdaşları ilə yanaşı bir çox dəyərli qonaqlar da qatılıb, şirkətə öz arzularını və təbriklərini çatdırıblar. Qonaqları salamlayan şirkətin rəhbərliyi, son illərdə görülən işlər, şirkətin siyasəti və gələcək planları barədə ətraflı məlumat verib. “70 il ərzində bir çox ilklərə imza atan Holcim Azərbaycan bundan sonra da ölkə iqtisadiyyatına müsbət təsir edəcək layihələr üçün yüksək keyfiyyətli məhsulların istehsal edilməsində öz töhfəsini verməyə çalışacaq. Gəlin sabahın bünövrəsini birlikdə quraq”, - Holcim şirkətinin Baş Direktoru Frederic Guimbal yubiley tədbirində qeyd edib. Sovetlər dönəmində “Qaradağ Sement” markası kimi tanınan zavod, bu gün Holcim Azərbaycan olaraq klinker, qalaq və kisə sementi istehsalında innovativ həllər tətbiq edən qabaqcıl müəssələrdən biridir. Qlobal təcrübəyə və keyfiyyətə malik olan Holcim Azərbaycanın istehsal etdiyi sement ilə ölkədə bir sıra müasir tikililər ərsəyə gəlmişdir. Buna Heydər Əliyev adına Beynəlxalq Hava limanı, Ələtdə yerləşən Bakı limanı, Koroğlu qovşağı, SOCAR-ın, SOFAZ-ın və AZƏRSU-nun inzibati binaları, Yeni Bulvar, Bakı Metropoliteninin yeni stansiyaları, Bakı Gəmiqayırma zavodu-nu misal olaraq göstərmək olar. Zavod istər fərdi ustalar uçün, istərsə də strateji və innovativ layihələr üçün müxtəlif markalı sementlər istehsal etməyə qadirdir.