Avropa Liqasında bu gün son püşk atılır
İdman 15 Mar 2019 10:52:00 247 0
Bu gün UEFA Avropa Liqasının 1/4 final və yarımfinal mərhələlərinin, eləcə də Bakıda keçiriləcək final qarşılaşmasının püşkü atılacaq.
Goal.az xəbər verir ki, Avropa futbol qurumunun İsveçrənin Nyon şəhərindəki mənzil-qərargahında keçiriləcək tədbir Çempionlar Liqasının püşkatma mərasimindən 1 saat sonra - Bakı vaxtı ilə saat 15:00-da start götürəcək.
Prosedura əsasən, komandalar “səpələnmişlər” və “səpələnməmişlər”ə bölünməyəcəklər. Bir ölkəni təmsil edən kollektivlər bir-birləri ilə düşə bilərlər.
Adları birinci çıxacaq komandalar ilk oyunu evdə keçirəcəklər. Əvvəlki mövsümlərlə müqayisədə, bu dəfə təkcə 1/4 finalın deyil, yarımfinal və finalın (nominal meydan sahibi) da püşkü atılacaq.
Qeyd edək ki, aprelin 11-də və 18-də 1/4 final, mayın 2-də və 9-da yarımfinal, mayın 29-da isə Bakı Olimpiya Stadionunda final görüşü keçiriləcək.
Püşkatmaya qatılacaq komandalar:
Eintracht (Almaniya)
Arsenal (İngiltərə)
Valencia (İspaniya)
Benfica (Portuqaliya)
Chelsea (İngiltərə)
Villarreal (İspaniya)
Napoli (İtaliya)
Slavia (Çexiya)