Bıçaqla qorxutmaq istədi,


Kriminal 28 Fev 2019 09:05:00 371 0

Bıçaqla qorxutmaq istədi,

Bakı Ağır Cinayətlər Məhkəməsində paytaxtda qəsdən adam öldürməkdə təqsirləndirilən 2000-ci il təvəllüdlü Ağaramazan İsmayılovun cinayət işi üzrə məhkəmə prosesi ötən gün başlayıb.

Son.az Trend-ə istinadən bildirir ki, hakim Ramella Allahverdiyevanın sədrliyi ilə keçirilən prosesdə prokuror ittiham aktını elan edib.

Özünü ittihamlarda təqsirli bilən təqsirləndirilən şəxs deyib ki, Musa Babayevlə qonşu olub və mərhumla aralarında mütəmadi mübahisələr yaranıb: "Məni söyürdü, təhqir edirdi. Artıq onun təhqirlərindən bezmişdim. Sonra Musa məni görüşə çağırdı. Evdən bıçaq götürüb getdim. Onu bıçaqla qorxutmaq istəyirdim. Lakin həmin zaman məni yenə təhqir edib döydü. Mən də hadisə zamanı özümdə olmadım, bıçağı necə vurduğum da yadımda deyil. Evə gəldim, bacıma dedim. Bacım da atama dedi. Məni aparıb polisə təhvil verdilər. Həmin bıçağı da polisə təqdim etdim".

Proses martın 6-da davam edəcək.

İttihama görə, ötən il Binəqədi rayonunun Hökməli qəsəbəsində 2000-ci il təvəllüdlü A.İsmayılov 2002-ci il təvəllüdlü Musa Babayevi bıçaqlayaraq qətlə yetirib.

Polis əməkdaşlarının keçirdikləri əməliyyat nəticəsində cinayəti törədən A.İsmayılov saxlanılıb.

Araşdırma zamanı meyitin üzərində zorakılıq əlamətləri aşkarlanıb.

Məlumata görə, gənclər arasında dava şit zarafat üstündə olub. Belə ki, A.İsmayılov avtobusda sürücü köməkçisi işləyən zaman qonşusu M.Babayev onun başına iki dəfə sillə vurub.

A.İsmayılovun sözlərinə görə, həmin vaxt avtobusda sərnişinlər də olub və bu hərəkəti qəbul edə bilməyib. Sonra isə aralarında yenə mübahisə düşüb və o, M.Babayevi bıçaqlayaraq öldürüb.

Son.az