Sağlam yaşamağın açarı, ilk növbədə, sağlam qidalanmadan asılıdır. Qəbul edilən qidalar orqanizmin vitamin və minerallara olan gündəlik ehtiyacını ödəməlidir. Hər bir qidanın normadan artıq qəbul edilməsi xoşagəlməz halların yaranmasına səbəb olur. Odur ki, sağlam yaşamaq üçün qida rejiminə ciddi şəkildə əməl edilməsi vacibdir.

Son.az AZƏRTAC-a istinadən bildirir ki, gün ərzində ən azı 2-3 litr maye qəbul edilməsi bu sahədə ən ilkin göstərişlərdən biridir. Səhər yataqdan qalxarkən bir stəkan su içilməsi çox faydalıdır. Yemək əsnasında və yeməkdən dərhal sonra su içmək düzgün deyil. Yayda tərləmə halları çox olduğuna görə içilən suyun, qəbul edilən mayenin, mineral sular, meyvə və tərəvəzlərin tərkibində olan suyun miqdarına fikir vermək lazımdır. Süni dad verən limonad və nektar sular qəbul edilməsindən uzaq olmaq lazımdır. Hər gün idmanla məşğul olmaq, yeməkdən sonra 20 dəqiqə gəzintiyə çıxmaq sağlamlıq üçün əhəmıyyətlidir. İdman orqanizmi tarazlayır, qan dövranını tənzimləyir, stressdən uzaqlaşdırır.