İnformasiya və kommunikasiya texnologiyaları inkişaf etdikcə və internetin sürəti artdıqca ənənəvi televiziyanın internet üzərindən izlənməsi də yeni tendensiyaya çevrilir.

Son.az AZƏRTAC-a istinadən bildirir ki, Avropa Statistika İdarəsinin (EUROSTAT) məlumatına əsasən, qitə əhalisinin orta hesabla 11 faizi televiziya kanallarını internet yayımı, videomaterialları "smart-tv" vasitəsilə izləyir. Eyni zamanda, onlayn televiziyalara maraq getdikcə artmaqdadır. 2016-cı ilin statistik göstəricilərinə görə, Niderland və Böyük Britaniya əhalisi bu baxımdan ilk sıralardadır. Bu iki ölkədə əhalinin 22 faizi artıq televiziya kanallarını internet vasitəsilə izləyir. Sonrakı yerlərdə İsveç (21 faiz), Danimarka (20 faiz), Finlandiya (17 faiz), Almaniya (16 faiz) və Lüksemburq (15 faiz) dayanır. Avstriya 13 faizlə orta Avropa göstəricisindən bir qədər yuxarıda qərarlaşıb.