Heydər Əliyev Beynəlxalq Aeroportu 2018ci ilin on ayı ərzində


Digərləri 13 Noy 2018 17:50:00 334 0

Heydər Əliyev Beynəlxalq Aeroportu 2018ci ilin on ayı ərzində

2018-ci ilin on ayı ərzində Heydər Əliyev Beynəlxalq Aeroportu ümumilikdə 3,8 milyon sərnişinə xidmət göstərmişdir. Bu göstərici ötən ilin analoji göstəricisindən 10 faiz çoxdur.

Son.az xəbər verir ki, "Azərbaycan Hava Yolları" (AZAL) Milli Aviadaşıyıcısı tərəfindən 1 milyon 628 min sərnişin, "Buta Airways" milli aşağıbüdcəli aviaşirkəti tərəfindən isə 382 min sərnişin daşınmışdır.

İlin əvvəlindən beynəlxalq reyslərdə ümumilikdə 3,28 milyon sərnişinə (ümumi sərnişin axınının 86 faizi) xidmət göstərilmişdir. Beynəlxalq sərnişinlərin ümumi sayının 34 faizi AZAL-ın, 11,6 faizi  isə "Buta Airways"in payına düşmüşdür.     

Oktyabr  ayında beynəlxalq sərnişin axını üzrə aviaşirkətlərin onluğuna AZAL və "Buta Airways" ilə yanaşı "FlyDubai", "Turkish Airlines", "Air Arabia", "Aeroflot", "UIA" (Ukrayna Beynəlxalq Hava Yolları), "Qatar Airways", "Utair", "SCAT", "Lufthansa" və "S7 Airlines" daxil olmuşdur. Bu aviaşirkətlər tərəfindən ümumilikdə 123 min sərnişinə xidmət göstərilmişdir.

Hazırda Bakının hava limanı 40-dan çox istiqamət üzrə 30 aviaşirkətə xidmət göstərir. Oktyabr ayında ən məşhur beynəlxalq istiqamətlərin onluğuna İstanbul, Moskva, Dubay, Kiyev, Şarja, Tehran , Bağdad, Tbilisi, Doha və Tel-Əviv daxildir. Bu istiqamətlər üzrə 210 min sərnişin uçuş həyata keçirmişdir.