İmam Sadiq namazı necə qılırdı?


Digərləri 06 Noy 2018 23:50:00 358 0

İmam Sadiq namazı necə qılırdı?

Həmad ibni İsa nəql edir: "İmam Sadiqin (ə) xidmətində idim, mənə buyurdu: "Namazı yaxşı qıla bilərsənmi?". Dedim: "Necə bacarmayım ki, namaz haqqında yazılan "Həriz" kitabını əzbərdən bilirəm"".

Son.az deyerler.org-a istinadən bildirir ki, Həzrət (ə) buyurdu: "Sənin üçün zərəri yoxdur, ayağa qalx və namaz qıl ki, mən də sənin necə namaz qıldığını görüm". Mən üzü qibləyə dayanıb, namaz qılmağa başladım və namazın bütün rüku və səcdəsini yerinə yetirdim. Ancaq İmam (ə) bu namazı bəyənmədi və buyurdu: "Namazı yaxşı qılmadın. Necə də bir insan üçün çirkindir ki, ömründən 60-70 il keçər və bir kamil namaz qıla bilməz".

Mən xəcalət çəkdim və dedim: "Qurban olum, namazı mənə təlim verin". İmam (ə) üzü qibləyə dayandı və əllərini azad buraxdı. İmamın (ə) barmaqları bir-birinə sıxılmış idi. Ayağının barmaqlarını da qibləyə tərəf çevirdi, təvazökarlıq və qəlb hüzuru ilə buyurdu: "Allahu Əkbər". Sonra "Həmd" və "İxlas" surəsini tərtillə oxudu. "İxlas" surəsi bitəndən sonra bir nəfəs çəkilən qədər səbir etdi.

Sonra əllərini üzünə qədər qaldırdı və dayandığı halda buyurdu: "Allahu Əkbər". Ondan sonra rükuya getdi və əllərinin içini dizinə qoydu. Həzrətin (ə) barmaqları açılmış halda idi. Ondan sonra səcdəyə getdi və səcdə halında əllərini bədəninə yapışdırmamışdı və bədəninin yeddi üzvünü yerə qoymuşdu. Səcdə edən zaman alnı, əllərinin içi, iki diz qapağı, ayağının iki baş barmağı, burnunun ucu yerə dəyirdi. Birinci səcdədən qalxan zaman buyurdu: "Allahu Əkbər". Sol böyrü üstə əyləşdi və sağ ayağının üstünü sol ayağının altına qoydu. Buyurdu: "Əstəğfirullahi Rabbi və ətubu iləyh" və əyləşdiyi yerdə yenə buyurdu: "Allahu Əkbər" və ikinci səcdəyə getdi. Onu da birinci səcdə kimi yerinə yetirdi. Təşəhhüdü deyən zaman İmamın (ə) barmaqları bir-birindən açılmış vəziyyətdə idi. Namazı bitirəndən sonra buyurdu: "Səcdə zamanı bədənin yeddi üzvünün yerə qoyulması vacibdir. Burnunun ucunu yerə qoymaq sünnətdəndir (müstəhəbdir)".