Goal.az Peşəkar Futbol Liqasının rəsmi saytına istinadən xəbər verir ki, VI turun “Sabah” – “Qarabağ” qarşılaşmasında 4500 tamaşaçı qeydə alınıb. “Əlincə Arena”dakı göstərici cari mövsümün arxada qalan 6 turu üçün mütləq rekorddur. Bunadək ən çox tamaşaçı III turun “Qarabağ” – “Neftçi” matçında qeydə alınıb. “Azərsun Arena”dakı görüşü 3000 azarkeş izləyib.

VI turun ümumi tamaşaçı sayı da rekordla diqqət çəkib. Dörd qarşılaşmanı ümumilikdə 6900 tamaşaçı izləyib. Bu da əvvəlki 5 turla müqayisədə ən yüksək göstəricidir.

Qeyd edək ki, "Neftçi" ilə matçda 1:1 hesablı heç-heçə edən "Qarabağ" "Sabah"la görüşdə qələbə qazanıb - 2:0.