Aktrisanın xəstəliyindən istifadə edərək camaatdan pul yığması, ölkə ictimaiyyətinin və o cümlədən Milli Onkologiya Mərkəzinin baş həkimi, Azərbaycanın baş onkoloqu Azad Kərimlinin qəzəbinə səbəb olub. Həkim bildirib ki, Tünzalə Əliyeva artıq sağalıb, səhhəti normaldır, rahat gəzir, qidalanır, efirə, səhnəyə çıxa bilir, lakin bütün Azərbaycandan kömək istəyir. Aktrisanın bu addımı bu gün də ciddi şəkildə tənqid olunmaqdadır.

Son.az Sputnik Azərbaycan-a istinadən bildirir ki, Tünzalə Əliyeva Azad Kərimlinin dediklərinə şərh verməkdən imtina edib. Bunu onunla əlaqələndirib ki, Kərimlinin müsahibəsini oxumayıb və oxumaq fikri də yoxdur. Aktrisa sadəcə onu deyib ki, vəziyyəti son zamanlar normallaşmağa başlayıb. Ona qədər isə özünü pis hiss edirdi.

"Hazırda müalicəm davam edir. Şükür Allaha ki, indi özümü çox yaxşı hiss edirəm. Həkimlər məni əmin ediblər ki, hər şey yaxşı olacaq və ən ağır vaxtlar artıq arxada qalıb. İnanıram ki, xərçəngə qalib gələ biləcəyəm" - deyə Əliyeva bildirib.

Aktrisa etiraf edib ki, onun sağlamlığı demək olar ki, qaydasındadır. Sadəcə müəyyən maliyyə problemləri var. Hazırda onun həlli vacib olan əsas problemi qızı və əri ilə birlikdə yaşadığı mənzilin ipotekasını bağlamaqdır.