İran dünyaca məşhur təyyarə istehsalçısı olan ATR konsernini beynəlxalq məhkəməyə verəcək.

Son.az AZƏRTAC-a istinadən bildirir ki, bu sözləri İran parlamentinin komitə sədri Məhəmmədrza Rezayi deyib. Onun sözlərinə görə, İran ilə konsern arasında 400 milyon dollar dəyərində müqavilə imzalanıb. Müqaviləyə əsasən ATR İrana 20 sərnişin təyyarəsi satmalı idi. Konsern ötən iki il ərzində İrana yalnız 13 təyyarə satıb. ABŞ "nüvə razılaşması"ndan birtərəfli qaydada çıxaraq İrana qarşı iqtisadi sanksiyaları bərpa etdikdən sonra konsern müqavilənin şərtlərini pozub və qalan 7 təyyarəni istehsal edib İrana satmaqdan imtina edib.

M.Rezayi bildirib ki, ATR konserni istənilən vəziyyətdə imzaladığı müqavilənin şərtlərinə əməl etməlidir. Əgər müqavilənin şərtlərini yerinə yetirməkdən imtina edirsə, onda İrana kompensasiya ödəməlidir.