Bu barədə Son.az-a açıqlamasında Bütöv Azərbaycan Xalq Cəbhəsi Partiyasının (BAXCP) sədr müavini, "Xalq Cəbhəsi" qəzetinin baş redaktoru, siyasi analitik Elçin Mirzəbəyli Prezident İlham Əliyevin Xorvatiyaya rəsmi səfərinin nəticələrini şərh edərkən bildirib.

Onun sözlərinə görə, Xorvatiya Şərqi Avropanın kiçik, amma çox mühüm geosiyasi mövqeyə malik ölkələrindən biridir: "Xorvatiya da Azərbaycan kimi beynəlxalq nəqliyyat dəhlizləri layihələrinin gerçəkləşdirilməsində ciddi uğurlara imza atıb. Ölkə ərazisindən Qərbi və Şərqi Avropa bölgəsini Asiya və Aralıq dənizi hövzəsi ilə birləşdirən 3 panavropa nəqliyyat dəhlizi keçir. Məhz bu amilə, eləcə də Şərqi Avropanın logistik həlqəsində strateji mövqeyə sahib olduğuna görə, Xorvatiya bu il Avropa İttifaqı fondlarından aldığı 1,7 milyard avroluq maliyyə dəstəyi ilə nəqliyyat dəhlizləri infrastrukturunun genişləndirilməsi üçün bir sıra müqavilələrə imza atıb".

Azərbaycan və Xorvatiya prezidentləri mətbuata bəyanatlarla çıxış ediblər - YENİLƏNİB - FOTO  Analitik qeyd edib ki, Xorvatiya və Azərbaycan arasında strateji tərəfdaşlıq əlaqələri vardır, bu əlaqələr genişlənir və güclənir: "Son illər Xorvatiyanın iqtisadiyyatında ciddi dəyişikliklər baş verib və sənayenin inkişafı ilə bağlı mühüm addımlar atılıb. Hazırda sənaye malları Xorvatiyanın idxalının 97%-ni təşkil edir. Sənaye inkişaf etdikcə, şübhəsiz ki, enerji resurlarına, neft və təbii qaza olan tələbat da artır. Xorvatiya çox məhdud enerji resurslarına malik olduğu üçün ölkə iqtisadiyyatı, demək olar ki, tamamilə enerji idxalından asılıdır. Bütün bu amillər, eləcə də Azərbaycanın enerji və nəqliyyat dəhlizləri ilə yürütdüyü uğurlu siyasət ölkəmizi Xorvatiya üçün cazibədar edir. Şərqi Avropanın olduqca əlverişli strateji mövqeyə malik bir ölkəsi kimi Xorvatiya da Azərbaycan üçün önəm kəsb edən dövlətlərdən biridir. İki ölkə arasındakı münasibətlərin inkişafı da, ilk növbədə, qarşılıqlı faydalılıq prinsipləri üzərində qurulan əməkdaşlığın böyük perspektivə malik olmasından qaynaqlanır. Yaxın iki il ərzində Azərbaycan qazı Cənub Qaz Dəhlizi ilə ilk dəfə olaraq Avropa məkanına çatdırılacaq. Beləliklə, Avropanın enerji təhlükəsizliyinə növbəti töhfə veriləcək. Azərbaycan öz qaz potensialını daha da böyük həcmdə Avropaya təqdim edə bilər. Təsadüfi deyil ki, artıq Xorvatiya ilə İon-Adriatik qaz kəmərinin tikintisi ilə bağlı da çox əhəmiyyətli danışıqlar aparılır".

## 683032## E.Mirzəbəyli hesab edir ki, Xorvatiya ilə strateji əməkdaşlığın genişləndirilməsi Azərbaycan prezidentinin yürütdüyü və xalqımızın, dövlətimizin maraqlarını ifadə edən çoxvektorlu xarici siyasətin mühüm elementlərindən biridir: "Xorvatiya Şərqi və Qərbi Avropanın nəqliyyat dəhlizləri şəbəkəsində mühüm strateji mövqeyə malikdir. Azərbaycan da hazırda Şərqlə Qərb arasında mühüm logistik mərkəz - körpü funksiyanı yerinə yetirir. Azərbaycan və Xorvatiyanın bu sahədə əməkdaşlıqlarının genişləndirilməsi, hər iki ölkənin ərazisindən keçən nəqliyyat dəhlizləri arasında sinerjinin yaradılması ciddi perspektivlər vəd edir. Xorvatiya Azərbaycanla Avropa İttifaqının münasibətlərinin inkişafına dəstək verən ölkələrdən biri kimi ölkəmizlə bütün istiqamətlərdən əməkdaşlığın genişləndirilməsi təşəbbüsü ilə çıxış edir. Bu ölkə Azərbaycanın təkcə Cənubi Qafqaz regionu üçün deyil, daha geniş, subregional bir formatda mühüm strateji mövqeyə malik olduğunu başa düşür və düzgün qiymətləndirir. Xorvatiyanın coğrafi mövqeyi, bu ölkənin Adriatik dənizi sahilində yerləşməsi, İtaliyadan sonra ən böyük sahilyanı zolağa malik olması da onun logistik mərkəz kimi cazibədarlığını daha da artırır. Şübhəsiz ki, bütün bu amillər Azərbaycanın da Xorvatiya ilə münasibətlərinə önəm verməsini əsaslandıran amillərdir".

Prezident İlham Əliyev: "Xorvatiya və Azərbaycan sözün əsl mənasında strateji tərəfdaşlardır" Ekspertin fikrincə, xüsusən iki ölkə arasında kənd təsərrüfatı sektorunda əlaqələrin inkişafı üçün böyük potensial var: "Xorvatiya həm də kənd təsərrüfatı ölkəsidir. Bu sahədən əldə olunan qazanc ölkə ÜDM-nin 20, 6%-ni təşkil edir. Xorvatiya istehsal olunan kənd təsrrüfatı məhsulları ölkənin bütün ehtiyacını təmin edir və hətta üstələyir. Bu baxımdan Xorvatiya təkcə Şərqi Avropanın deyil, bütövlükdə dünyanın kənd təsərrüfatı sahəsində yüksək məhsuldarlıq əldə etmiş ölkələrindən sayılır. Təsadüfi deyil ki, Azərbaycan prezidentinin səfəri çərçivəsində Azərbaycan Respublikasının Kənd Təsərrüfatı Nazirliyi ilə Xorvatiya Respublikasının Kənd Təsərrüfatı Nazirliyi arasında əməkdaşlıq haqqında Anlaşma Memorandumu imzalandı. Göründüyü kimi, Azərbaycan istər enerji, istər nəqliyyat dəhlizləri, istər kənd təsərrüfatı, istərsə də digər sahələr üzrə əməkdaşlıq müstəvisində öz tərəfdaşlarını ciddi araşdırmalar və təhlillər nəticəsində seçir. Məqsəd isə ölkə iqtisadiyyatının bütün sahələrini inkişaf etdirməkdən ibarətdir".

İlkin İzzət Son.az