Goal.az xəbər verir ki, Qurban Qurbanovun rəhbərlik etdiyi kollektiv Bakı Olimpiya Stadionunda Kosovo yığmasını qəbul edəcək. Bu, həm də 46 yaşlı mütəxəssisin millinin sükanı arxasında ilk rəsmi matçı olacaq.

2016-cı ilin mayında FİFA və UEFA-ya üzv qəbul olunan Kosovo yığması yalnız 2018-ci il dünya çempionatının seçmə mərhələsində iştirak edib. Səfərdə Finlandiyaya qarşı keçirdiyi ilk rəsmi matçda 1:1 hesablı heç-heçə edən kosovolular, təsnifat mərhələsindəki digər 9 qarşılaşmada uduzublar. Cəmi 3 qol vuran yığma, 24 top buraxıb.

Hazırda FİFA reytinqində Azərbaycan millisi 1207 xalla 105-ci, Kosovo yığması isə 1080 xalla 141-ci yerdədir.

İlk dəfə təşkil olunan Millətlər Liqası AVRO-2020-yə vəsiqə qazanmaq üçün əlavə, eyni zamanda əla şansdır. Çünki UEFA-ya üzv olan 55 ölkənin yığma komandaları qitə futbol qurumunun reytinqində yer aldıqları mövqeyə uyğun olaraq 4 liqaya və səbətlərə bölünüblər. 1 – 12-ci yerlər A, 13 – 24-cü yerlər B, 25 – 39-cu yerlər C, 40 – 55-ci yerlər isə D liqasına düşüblər.

Azərbaycan millisi Kosovo, Malta və Farer adaları yığmaları ilə birgə III qrupda yer alıb.

UEFA Millətlər Liqası

D liqası, III qrup

7 sentybar

20:00. Azərbaycan - Kosovo

Baş hakim: Ola Hobber Nilsen

Bakı Olimpiya Stadionu