Qurban Qurbanov: "Avropa Çempionatının final mərhələsinə çıxmaq üçün əla şansımız var"


İdman 04 Sen 2018 13:37:00 311 0

Qurban Qurbanov: "Avropa Çempionatının final mərhələsinə çıxmaq üçün əla şansımız var"

"Millətlər Liqası kimi turnirdə iştirak bizim üçün də yenilikdir. Hamı komandadan nəticə gözləyir. Ona görə də təzyiq həmişə olur".

Goal.az-ın məlumatına görə, bu sözləri UEFA-nın rəsmi saytına açıqlamasında milli komandamızın baş məşqçisi Qurban Qurbanov deyib. Yığmamızın Millətlər Liqasındakı şanslarını dəyərləndirən mütəxəssis AÇ-2020-nin final mərhələsinə vəsiqə qazanmağın çətin olduğunu bildirib:

"Deyə bilərik ki, Avropa Çempionatının final mərhələsinə çıxmaq üçün əla şansımız var. Amma nəzərə alaq ki, turnirdə iştirak edən digər yığmalar da bizim kimi düşünür. Belədə isə məsuliyyət daha da artır. İndi hamı düşünür ki, Avropa Çempionatına çıxmaq məhz Millətlər Liqasındakı matçlardan asılı olacaq. Baş məşqçi kimi isə mən turnirin bizim üçün ağır olacağını anlayıram. Üstəlik, hamının sizdən qələbə gözləməsi istər-istəməz həyəcan və məsuliyyəti artırır".

Qeyd edək ki, yığmamız Millətlər Liqasına Kosovo ilə oyunla start verəcək. Sentyabrın 7-də Bakı Olimpiya Stadionunda keçiriləcək qarşılaşma saat 20:00-da başlayacaq. Komandamız 3 gün sonra isə səfərdə Maltanın qonağı olacaq.