"Yanardağ"a giriş bağlanacaq? Turizmin inkişafı üçün dövlət qoruqlarında yeni idarəetmə sisteminə keçilir
Digərləri 09 Avq 2018 17:10:00 444 0
"Sosial şəbəkələrdə söhbətlər gəzir, deyirlər ki, guya təmir işləri ilə əlaqədar "Yanardağ" Dövlət Tarix-Mədəniyyət və Təbiət Qoruğuna giriş bağlanıb, qoruq fəaliyyətini dayandırıb, tursitlər artıq gəlmir. Gülməli olsa da, burada hətta qazın krantının bağlandığını deyənlər də var, halbuki orada qaz minillərdir birbaşa yerin təkindən çıxaraq yanır. Bütün bunlar həqiqətə uyğun deyil. Əvvəla, "Yanardağ" qoruğunda bərpa işlərinə yaxın günlərdə başlanacaq. Bərpa işləri 2018-ci ilin sonuna davam edəcək. Yəni işlər maksimum növbəti ilin əvvəlinədək tamamlanmalıdır. Ondan sonra "Yanardağ" qoruğu yeni görkəmdə və yeni xidmətlərlə yerli və əcnəbi turistlərə təqdim ediləcək. Qoruq hal-hazırda da ziyarətçilərin üzünə açıqdır, hətta bərpa işləri gedən zaman da həmişə açıq olacaq və fəaliyyətini davam etdirəcək".
Bu barədə Son.az-a açıqlamasında Azərbaycan Dövlət Turizm Agentliyinin nümayəndəsi Kənan Quluzadə bildirib.
Onun sözlərinə görə, bərpa işləri dedikdə orda qoruqda həm yenidənqurma, həm də yeni xidmət növlərinin yaradılması nəzərdə tutulur: "Təbiət bizə həmin ərazidə daim yanan od, alov bəxş edib, indi onun ətrafında ora gələn insanları məmnun etmək üçün yeni xidmətlər göstərmək lazımdır. Bura onların istirahətinin, qidalanmasının, əylənməsinin, normal sanitar qovşağı, internetlə təmin edilməsi, eləcə də ərazidə məlumatlandırıcı lövhələrin qoyulması daxildir. Yəni müasir turizm trendinə görə turist harasa gedəndə o darıxmamalıdır, yalnız ziyarət "gördü-getdi" ilə bitməməlidir. Turist həm gəzməli, görməli, məlumatlanmalı, həm də vaxtını xoş keçirməli, dincəlməli, əylənməli, istədiyi formada qidalanmalıdır".