Miladi XI əsrdə yaşamış Şeyx Əbu Cəfər Mühəmməd ibn Həsən Tusini cəfəri məzhəbinin inkişafındakı xidmətlərinə görə bu ləqəbə, yəni "şiə məzhəbinin şeyxi" ləqəbinə layiq bilmişlər. Son.az islam.az-a istinadən bildirir ki, o, fiqh, üsuli-fiqh, kəlam, təfsir, hədis elmlərində xüsusi istedad sahibi idi. Cəfəri məzhəbinin 4 ən mötəbər hədis məcmuəsindən ikisi ("Təhzib əl-kəlam" və "əl-İstibsar"), eləcə də, məşhur "Tibyan" təfsiri onun qələmindən çıxmışdır. O, Şeyx Müfid və Şərif Mürtəza kimi böyük alimlərdən dərs almışdı. Şeyx əl-taifə Tusinin 300-dən artıq tələbəsi olduğunu yazırlar. Alim Bağdadda yaşamış, daha sonra təqiblərdən Nəcəf şəhərinə sığınmış və burada elm mərkəzini təsis etmişdir. Nəcəf elm mərkəzinin çiçəklənməsi məhz Tusinin sayəsində baş vermişdir.