Dini icmalarda “Quran kurs”ları fəaliyyət göstərəcək


Digərləri 18 İyl 2018 16:01:00 264 0

Dini icmalarda “Quran kurs”ları fəaliyyət göstərəcək

Qafqaz Müsəlmanları İdarəsi (QMİ) dini maarifləndirmə və təhsil sahəsində məqsədyönlü fəaliyyətini davam etdirməkdədir.

Bakı. Qafqaz Müsəlmanları İdarəsi (QMİ) dini maarifləndirmə və təhsil sahəsində məqsədyönlü fəaliyyətini davam etdirməkdədir. Bu məqsədlə QMİ-də İdarənin təşkilati tabeçiliyində olan dini icmalarda gənclərin və yaşlıların Qurani-Kərimi öyrənmə kurslarının - “Quran kurs”larının rəhbərləri və nümayəndələri ilə görüş keçirilib. QMİ-nin Mətbuat Xidmətindən Trend-ə verilən məlumata görə, görüşdə QMİ sədrinin birinci müavini Hacı Salman Musayev, QMİ Aparatının rəhbəri Simran Həsənov, İdarənin Fətva və moizə şöbəsinin müdir müavini Əhliman Rüstəmov, müvafiq bölgə qazıları, səlahiyyətli nümayəndələr və kurslarda çalışacaq müəllimlər iştirak ediblər. Tədbirdə çıxış edən QMİ sədrinin birinci müavini Hacı Salman Musayev “Quran kurs”larının fəaliyyətə başlaması münasibətilə tədbir iştirakçılarını salamlayıb, onlara QMİ-nin sədri Şeyxülislam Allahşükür Paşazadə həzrətlərinin xeyir-duasını çatdırıb, “Quran kursu” rəhbərlərini və nümayəndələrini təbrik edib. S.Musayev bildirib ki, “Quran kurs”ları yalnız məscidlərdə və onlara məxsus olan köməkçi tikililərdə bir tədris ili müddətinə təşkil edilir və “Quran kurs”larında tədris Azərbaycan Respublikasında təhsil alan ali və ya orta dini təhsili olan Azərbaycan Respublikası vətəndaşı, habelə QMİ tərəfindən icazə verilən digər şəxslər tərəfindən aparılacaq. QMİ sədrinin birinci müavini onu da bildirib ki, “Quran kurs”larının tədris proqramı və tədris müddəti artıq QMİ tərəfindən təsdiq olunub və yaxın zamanlarda QMİ-yə müraciət etmiş digər dini icmalarda da “Quran kurs”larının fəaliyyətə başlaması məsələsinə baxılacaq.