Bakı. Məşhur gündəlik Şotlandiya qəzeti olan “The Scotsman”in (“Şotlandiyalı”) oxucuları Bakı Ali Neft Məktəbini (BANM) bu il bitirən məzunların adlarını bilmək imkanı əldə ediblər. Ali Məktəbdən Trend-ə verilən məlumata görə, Şotlandiyanın müxtəlif universitetlərində diplomların təqdim olunma mərasiminə həsr edilmiş qəzetin “Perspektivlər” bölməsində BANM ilə əməkdaşlıq edən Heriot Vatt Universitetinin (HVU) 2018-ci il məzunlarının da siyahısı dərc olunub. Onların arasında HVU-nin “Neft-qaz mühəndisliyi” və “Kimya mühəndisliyi” ixtisası üzrə bakalavr dərəcəsinin diplomunu əldə edən 80-dən çox BANM tələbəsinin adı var. Qeyd edək ki, azərbaycanlı məzunlara Böyük Britaniya universitetinin diplomlarının təntənəli təqdim olunma mərasimi 28 iyunda BANM-ın Məzun Günündə həyata keçirilib.