Bakı. Norveç Azərbaycanlıları Gənclər Təşkilatı (NAYO) Norveçdə uşaq, mədəni müxtəliflik və sağlam qida naminə "Uşaq və yemək" festivalı ilə tarixi bir uğura imza atıb. Diasporla İş üzrə Dövlət Komitəsindən Trend-ə verilən məlumata görə, Oslonun mərkəzi Saqene rayonunda təşkil olunan festivalda 15-dən yuxarı ölkənin təmsilçiləri iştirak edib və onlar öz fəaliyyətləri barədə məlumat verib, eyni zamanda milli yeməklərini nümayiş etdiriblər. NAYO-nun baş katibi Əlizamin Cəfərli Azərbaycan gənclərinin Norveçdə daima aktiv fəaliyyətləri ilə seçildiklərini bildirib. Norveçin işçi partiyasının fəal siyasətçisi və Oslo şəhər şurasının üzvü Yorqen Fos NAYO-nun bu işdə təşkilatçılığını yüksək qiymətləndirib və festivalın həqiqətən də Norveç cəmiyyətinin aktual məsələsini bir daha diqqətə çatdırdığını qeyd edib.