İspaniya milli komandasının futbolçusu Dieqo Kosta Rusiyada keçirilən dünya çempionatında iranlı jurnalistlə söz savaşına çıxıb.

"Report"un məlumatına görə, insident İran yığması ilə II tur matçından sonra baş verib. Qələbə topunun müəllifinin ona ünvanlanan "Nəyə görə rəqibinizin oyunçularını təxribata çəkirdin?" sualından xoşu gəlməyib. Kostanın cavabı belə olub: "Sən hansı oyuna baxmısan? Bu, birinci hissədə baş verdi. Amma biz rəqibi yox, rəqib bizi təxribata çəkdi. Onlar meydanda uzanıb vaxt keçirdilər. Oyuna diqqətlə bax. Düzünü deyə bilməzsən, çünki bu, sənin ölkənin komandasıdır".

Qeyd edək ki, 1:0 hesabı ilə qalib gələn İspaniya yığması xallarını 4-ə çatdırıb və Portuqaliya ilə birgə B qrupuna başçılıq edir. İran isə 3 xalla 3-cü pillədə qalıb.