Bu il sosial xidmət müəssisələrindən 12 uşaq yenidən doğma ailələrinə qayıdıb
Sosial 21 İyn 2018 11:12:07 271 0
Sağlamlıq imkanları məhdud uşaqlar üçün 1 və 2 saylı sosial xidmət müəssisələrində 290 uşaq yaşayır
Bu barədə “Report”a nazirliyin İctimaiyyətlə əlaqələr şöbəsindən məlumat verilib.
Məlumatda qeyd edilib ki,Heydər Əliyev Fondunun “Uşaq evləri və internat məktəblərinin inkişafı” Proqramı çərçivəsində hər iki sosial xidmət müəssisəsində uşaqların yaşayışı, hərtərəfli təminatı, reabilitasiyası üçün müasir tələblərə uyğun şərait yaradılıb. Bu müəssisələrdə uşaqların ətraf mühitə uyğunlaşmasına mane olan funksional çatışmazlıqların, davranış problemlərinin aradan qaldırılması, ilkin bacarıq və vərdişlərə yiyələnmələri üçün müvafiq işlər aparılır, onların doğma ailə mühitinə qayıtmaları istiqamətində tədbirlərə xüsusi önəm verilir.
Övladları ilə görüşə gələn valideynlərlə fərdi qaydada və maarifləndirici söhbətlər aparılır. Bəzən valideynlər övladlarını bu müəssisələrə verdikdən bir müddət sonra yenidən onlarla görüşə gələrkən uşaqlarının davranışında müəyyən müsbət dəyişikliklər görərək onları yenidən özləri ilə ailələrinə qaytarırlar.
Görülən tədbirlərin nəticəsi kimi, cari ilin ötən dövründə həmin sosial xidmət müəssisələrindən 12 uşaq yenidən doğma ailəsinə qayıdıb.