Bakı. İqtisadiyyat naziri Şahin Mustafayev Yunanıstanın Azərbaycandakı səfiri ilə görüşüb. İqtisadiyyat Nazirliyindən Trend-ə verilən məlumata görə, nazir ölkələrimiz arasında diplomatik əlaqələrin 1992-ci ildə qurulduğunu, Yunanıstan Səfirliyinin Azərbaycanda açılan ilk səfirliklərdən olduğunu qeyd edib. Vurğulanıb ki, Prezident İlham Əliyev Yunanıstanda 3 dəfə səfərdə olub, Yunanıstan rəsmiləri də ölkəmizdə səfərlərdə olublar və ölkələrimiz arasında 25-ə yaxın sənəd imzalanıb. Ölkələrimiz arasındakı Hökumətlərarası Komissiya, Azərbaycan və Yunanıstan parlamentlərində fəaliyyət göstərən işçi və dostluq qrupları, Yunanıstan-Azərbaycan Ticarət Palatası və “Qala” Yunanıstan-Azərbaycan Dostluq Cəmiyyəti uğurlu əməkdaşlıq mexanizmlərindəndir.