İtaliyanın Rozeto-deli-Abrutsi şəhərində gənc boksçular arasında Avropa birinciliyi davam edir. Yarışın ikinci günündə Azərbaycan millisinin 3 idmançısı rinqə çıxıb. Onların hər 3-ü döyüşünü qələbə ilə başa vurub. Goal.az xəbər verir ki, 60 kq çəki dərəcəsində qüvvəsini sınayan Nurlan Səfərov 1/16 final mərhələsi çərçivəsində Stefan Kirkorovla (Bolqarıstan) qarşılaşıb. Görüş təmsilçimizin 5:0 (30:25, 30:27, 30:27, 30:27, 30:27) hesablı qələbəsi ilə yekunlaşıb. Səfərov 1/8 finalda rusiyalı Kaqir Minatullayevlə üz-üzə gələcək. Döyüş aprelin 20-də baş tutacaq. Zaur Musayev (81 kq) də ilk qarşılaşmasını qələbə ilə başa vurub. O, 1/8 finalda Damyan Zavieruşinskini (Polşa) texniki nokautla mübarizədən kənarlaşdırıb. Musayev növbəti görüşünü rusiyalı Ruslan Kolesnikova qarşı keçirəcək. Bu döyüş aprelin 21-də olacaq.