Britaniya parlamentinin üzvü: "Azərbaycanda seçki prosesi çox yaxşı təşkil olunub"


Siyasət 11 Apr 2018 11:31:00 245 0

Britaniya parlamentinin üzvü: "Azərbaycanda seçki prosesi çox yaxşı təşkil olunub"

Azərbaycanda prezident seçkiləri prosesi çox yaxşı təşkil olunub.

Son.az Trend-ə istinadən xəbər verir ki, bunu britaniyalı müşahidəçi, Böyük Britaniya parlamentinin Mühafizəkarlar Partiyasından olan üzvü Devid Morris deyib.

O bildirib ki, rəhbərlik etdiyi nümayəndə heyəti Bakıda artıq 2 seçki məntəqəsində olub:

"Seçki prosesinin yaxşı təşkil olunduğunu görürük. Bundan sonra hansı məntəqələrə baş çəkəcəyimizi hələ bilmirik. Çalışacağaq ki, yalnız Bakı ilə kifayətlənməyək. Mən 2016-cı ildə Azərbaycanda referendumu müşahidə etmişəm. Həmin vaxt 8-10 məntəqədə olmuşduq və düşünürəm ki, bu dəfə də belə olacaq".

Britaniya nümayəndə heyətinin üzvü, "The London Post" nəşrinin baş redaktoru Şahid Qureyşi də seçki prosesinin yaxşı getdiyini bildirib:

"İnsanlar seçkilərdə fəal iştirak edirlər. Hər şey yüksək səviyyədə təşkil olunub. Ümid edirəm ki, günün axırınadək hər şey belə davam edəcək".

Qeyd edək ki, bu gün Azərbaycanda prezident seçkiləri keçirilir. Prezident seçkilərində 8 nəfərin namizədliyi qeydə alınıb. Onlardan 6 nəfərin namizədliyi siyasi partiyalar tərəfindən, bir nəfərin namizədliyi öz təşəbbüsü ilə, bir nəfərin namizədliyi isə təşəbbüs qrupu tərəfindən irəli sürülüb.

Səsvermə günü respublikada 125 seçki dairəsi üzrə 5426 daimi və 215 müvəqqəti seçki məntəqəsi fəaliyyət göstərir. Səsvermə prosesini gün ərzində Mərkəzi Seçki Komissiyasının saytından da izləmək mümkündür. Belə ki, 119 seçki dairəsi üzrə 1000 seçki məntəqəsində veb-kameralar quraşdırılıb.

Seçkiləri 894 beynəlxalq (61 təşkilat, 59 ölkə), 58 175 yerli müşahidəçi izləyir.

Prezident seçkilərində səsvermə saat 19:00-da sona çatacaq. Hazırkı məlumata əsasən, Azərbaycanda 5 milyon 309 min 434 nəfər səsvermə hüququ olan şəxs var, onlardan 50.78 faizini qadınlar, 49.22 faizi isə kişilər təşkil edir.

Saat 10:00-a olan məlumata görə, prezident seçkilərində respublika üzrə seçicilərin 18,71 faizi, yəni 994 196 seçici səs verib.

Son.az