Goal.az xəbər verir ki, paytaxt təmsilçisi buna 1/4 finalda İspaniya Barcelona-sını üstələməklə nail olub. Səfər matçında 1:4 hesabı ilə uduzmasına baxmayaraq, "canavarlar" evdə qələbəyə nail olublar - 3:0. Nəticədə Roma səfər qolu sayəsində mərhələ adlayıb. "Sarı-qırmızılar" sonuncu dəfə yarımfinala Çempionlar Kubokunda 1983-1984 mövsümündə yüksəliblər. Həmin vaxt bu komanda Şotlandiya -Dandy United-ini iki oyunun yekununda üstələyib - 0:2, 3:0. Lakin finalda "canavarlar"ın qarşısını İngiltərə Liverpool-u kəsib - 1:1 (penaltilərlə - 2:4).

Roma Çempionlar Liqasında 3 və daha çox top fərqini aradan qaldırmağı bacaran 3-cü komanda olub. 

Barselona tarixində ilk dəfə birinci oyunu 3 və daha çox top fərqi ilə başa vurduğu halda, təkrar qarşılaşmada uduzaraq, avrokuboklarla vidalaşıb.

Liverpool isə 10 ildən sonra Çempionlar Liqasında yarımfinala vəsiqə qazanıb. "Qırmızılar" turnirin favoriti kimi göstərilən Manchester City-ni evdə 3:0, səfərdə isə 2:1 hesabı ilə yeniblər. 2007-2008 mövsümündə isə bu klub İngiltərənin daha bir təmsilçisi Arsenal-ı üstələmiş (1:1, 4:2), yarımfinalda Chelsea-yə uduzmuşdu - 1:1, 2:3. Liverpool bir mövsüm ərzində Xosep Qvardiolanın rəhbərlik etdiyi kollektivi üç dəfə yenməyi bacaran ilk klub olub. Ötən həftə ilk görüşdə Manchester City-ni 3:0 hesabı ilə məğlub edən Yurgen Kloppun komandası İngiltərə Premyer Liqasının II dövrəsində isə 4:3 hesabı ilə qalib gəlib.