Azərbaycanda 15 əcnəbi saxlanılıb
Digərləri 29 Mar 2018 11:29:00 231 0
Dövlət Miqrasiya Xidməti qanunsuz miqrasiyaya qarşı mübarizə çərçivəsində tədbirləri davam etdirir.
Xidmətdən Son.az-a verilən məlumata görə, qanunsuz miqrasiyaya qarşı keçirilən tədbirlər zamanı 14 nəfər Hindistan və 1 nəfər Banqladeş vətəndaşı olmaqla, ümumilikdə 15 əcnəbi saxlanılıb.
Araşdırma zamanı Hindistan vətəndaşlarından 6 nəfərin Azərbaycan ərazisində olma və yaşama qaydalarını pozduğu və 8 nəfərin ölkəyə gəlişinin bəyan edilmiş məqsədinə əməl etmədiyi məlum olub.
Saxlanılmış və ölkə ərazisində qanunsuz yaşayan Banqladeş vətəndaşı Abir Mirzanur Rahmanın müəyyən məbləğdə ödəniş qarşılığında saxta müvəqqəti yaşamaq üçün icazə vəsiqəsi əldə etməyə çalışdığı məlum olub. Belə ki, Dövlət Miqrasiya Xidməti tərəfindən Rusiya Federasiyasının azyaşlı vətəndaşının adına verilmiş vəsiqənin elektron nüsxəsi üzərində məlumatlar dəyişdirilərək A.M.Rahmanın adına saxtalaşdırılıb. Əcnəbi həmin vəsiqənin Azərbaycan vətəndaşı Yusubov Tərlan Tofik oğlu tərəfindən hazırlandığını bildirib.