Son.az islam.az-a istinadən bildirir ki, çünki insanları həyatda mücadilə aparmağa, təslim olmamağa çağıran İslam dini, xəstələndikdə də müalicə olunmağa təşviq edir. Hz Peyğəmbər bu barədə belə buyurmuşdur: "Ey Allahın qulları, müalicə olunun. Çünki Allah qocalıqdan başqa dərmansız heç bir xəstəlik verməyib" (Əbu Davud, 4/3, 7). Başqa bir hədisdə isə belə buyurulur: "Allah şəfası olmayan heç bir xəstəlik yaratmamışdır" (Əhməd ibn Hənbəl: 4278, İbn Macə, 3436, Əbu Davud 3855, Tirmizi 2039). Lakin unutmamalıyıq ki, sağlam həyatı əsas alan dinimiz xəstə insanları müalicə olunmağa təşviq etməklə bərabər, xəstələnməmişdən əvvəl müxtəlif xəstəliklərə qarşı ön tədbirlərin alınmasını daha məqsədəuyğun hesab edir. Bu xəstəliklərin içərisində xüsusilə yoluxucu xəstəliklərə qarşı son dərəcə diqqətli olmaq, bunların yayılmasının qarşısını almaq üçün tədbirlər görmək hər bir insanın borcudur. Hər bir insan belə bir təhlükədən özünü gözləməlidir. Necə ki, Qurani-Kərimin Bəqərə surəsinin 195-ci ayəsində belə buyurulur: "Öz əlinizlə özünüzü təhlükəyə atmayın". Aydındır ki, bir yerdə yoluxucu xəstəlik olduğunu bilə-bilə oraya getmək, elə insanın özü-özünü təhlükəyə atması deməkdir. Deməli, belə bir xəstəlik ehtimalı olan yerlərdən uzaq durmaq lazımdır. Yoluxucu bir xəstəlik olan vəba haqqında Hz. Peyğəmbər belə buyurmuşdur: "Vəbanın ortaya çıxdığını eşitdiyiniz bir yerə getməyin. Əgər olduğunuz yerdə vəba görülərsə, siz də oradan çölə çıxmayın". Yoluxucu xəstəliklər barəsində başqa bir hədisində isə Hz. Peyğəmbər belə buyurur: "Cüzam xəstəliyi olan adamdan aslandan qaçan kimi qaçın". Əziz möminlər! Yuxarıdakı hədislərdən də anlaşıldığı kimi, xüsusilə yoluxucu xəstəliklərin geniş yayıldığı şəraitdə yaşayan insanlar bu mövzuda ayıq olmalı, heç bir vəchlə öz həyatını təhlükəyə atmamalıdır. Çünki, həm gündəlik həyatımızdan, həm də tarixdən gördüyümüz kimi, QİÇS, taun, vəba, qripin müxtəlif formaları kimi yoluxucu xəstəliklər məhz insanların etinasızlığı ucbatından sürətlə yayılmış və bəşəriyyətin bəlasına çevrilmişdir.  Bu anlamda xüsusilə son zamanlar daha çox yayılmağa başlamış "Quş qripi" epidemiyasının da adını çəkmək lazımdır. Bu gün bu xəstəliyə qarşı güclü mübarizə aparılsa da, xəstəlik dayanmadan irəliləyir və daha çox ərazilərdə yayılmağa başlayır. Əsasən quşlar arasında yayılaraq insana keçən və çox ağır fəsadlar törədən bu xəstəliyə qarşı hər bir insan ayıq olmalı, öz həyatını qoruyaraq həm də Allahın əmrinə itaət etməlidir. Heç bir müsəlmanın özünü təhlükəyə atmağa ixtiyarı yoxdur. Çünki bizi yaradan Allah bu canı bizə əmanət olaraq vermişdir və əmanəti sahibinə qaytarana qədər onu qorumaq hər birimizin borcudur. Elə isə əmanəti qoruyaq və özümüzü təhlükəyə atmayaq.