Sabiq MTN əməkdaşı məhkəmədən yenidən vaxt istəyib


Sosial 16 Mar 2018 12:44:00 288 0

Sabiq MTN əməkdaşı məhkəmədən yenidən vaxt istəyib

Məhkəmə iclası aprelin 6-dək təxirə salınıb

Bu gün Bakı Ağır Cinayətlər Məhkəməsində dələduzluqda təqsirləndirilən Ceyhun İbayev, Vüqar Əsədov, Vüqar Güləli, Anar İsmayılov və Nicat Əliyevin cinayət işi üzrə məhkəmə iclası davam etdirilib.

"Report"un xəbərinə görə, hakim Fikrət Qəribovun sədrliyi ilə keçirilən prosesdə təqsirləndirilən Vüqar Güləli son söz üçün yenə vaxt istəyib.

O, zərərçəkmişə dəymiş ziyanla bağla ödəniş edəcəyi ilə bağlı söz verib.

Zərərçəkmiş şəxs bildirib ki, V.Güləli yenə hamını aldadır.

Məhkəmə sonuncu dəfə V.Güləliyə vaxt verib.

Məhkəmə iclası aprelin 6-dək təxirə salınıb.

Xatırladaq ki, dövlət ittihamçısı çıxışında V.Güləlinin 9 il, N.Əliyevin 8 il 6 ay, C.İbayevin 8 il, V. Əsədovun 7 il 6 ay, A. İsmayılovun 3 il azadlıqdan məhrum edilməsini istəmişdi.

Qeyd edək ki, ittiham aktına əsasən C.İbayev, V.Əsədov, V.Güləli, A.İsmayılov və N.Əliyev bir qrup vətəndaşın etibarından sui-istifadə edərək, onlara qarşı dələduzluq edib.

Belə ki, həmin şəxslər zərərçəkmiş Səriyyə Tahirovanın həyat yoldaşını həbsdən azad edəcəkləri vədi veriblər. Onlar qadının 147 min manat pulunu dələduzluq yolu ilə ələ keçirib. Bundan başqa, təqsirləndirilən şəxslər digər vətəndaşlara da qarşı dələduzluq ediblər.

C.İbayev, V.Əsədov, V.Güləli və N.Əliyev Cinayət Məcəlləsinin 178.3.2-ci (dələduzluq, külli miqdarda törəldildikdə) maddəsi ilə ittiham olunur.

V.Əsədov, A.İsmayılov və C.İbayev barəsində ev dustaqlığı qətimkan tədbiri seçilib.

Xatırladaq ki, V.Güləli ləğv edilmiş Milli Təhlükəsizlik Nazirliyinin (MTN) sabiq polkovniki, V.Əsədov isə Pentensiar Xidmətin sabiq əməkdaşıdır.