Bakı. Üçüncü Buktreyler Festivalının Promo videoçarxı təqdim olunub. Trend-in məlumatına görə, Mədəniyyət və Turizm Nazirliyinin təşkilati dəstəyi, Beynəlxalq Muğam Mərkəzinin tərəfdaşlığı ilə keçirilən “Kitabı tanıdın, kitabla tanının” sloqanlı Buktreyler Festivalının məqsədləri kitab və mütaliənin cəmiyyətimizdə təbliği, mütaliəyə münasibətin yaradıcı formaların inkişafı və dəstəklənməsi, kino sahəsində istedadlı və yaradıcı gənclərin üzə çıxarılması, buktreylerlərin incəsənət və biznesdə bir istiqamət kimi inkişafıdır. Layihənin müəllifi və rəhbəri kinoaktyor, prodüser Ruslan Sabirlidir. Çarxın rejissoru və dublyaj R.Sabirliyə, qrafika işi Tariel Bağırzadə, səs yazılışı Azər Hacıəskərliyə məxsusdur.