Bakı. Yeni Azərbaycan Partiyası Binəqədi rayon təşkilatının akt zalında Binəqədi Rayon İcra Hakimiyyətinin (RİH) başçısı Xaləddin İsgəndərovun rəhbərliyi ilə rayon ərazisində “İctimai təhlükəsizliyin təmin edilməsi” ilə əlaqədar müşavirə keçirilib. Trend-in məlumatına görə, müşavirədə Binəqədi RİH başçısının müavinləri, Aparatın şöbə müdirləri, hüquq mühafizə orqanlarının rəhbərləri, İcra Hakimiyyəti başçısının inzibati və sahə inzibati ərazi dairəsi üzrə nümayəndələri, bələdiyyə sədrləri, kommunal xidmət sahələrinin rəhbərləri, din xadimləri, ictimai birliklərin sədrləri və məktəb direktorları iştirak edib. X.İsgəndərov müşavirəni açaraq qarşıdan gələn 11 aprel 2018-ci il tarixinə təyin olunmuş prezident seçkiləri ilə əlaqədar rayon ərazisində “İctimai təhlükəsizliyin təmin edilməsi” məqsədi ilə görüləcək işlər barəsində tapşırıq və tövsiyələrini verərək bildirib ki, prezident seçkilərinə hazırlıq və səsvermə günü strateji əhəmiyyət daşıyan və digər obyektlər gücləndirilmiş iş rejiminə keçirilməli, seçki məntəqlərində seçki sənədlərinin etibarlı saxlanmasını təmin etmək məqsədi ilə məntəqələr dəmir seyflərlə, qapı və pəncərələr dəmir barmaqlıqlarla təmin edilməli, səsvermə günü seçki prosesini pozan və pozmağa cəhd edən, qanunazidd hərəkətlərin qarşısının alınması üçün tədbirlər görülməli, təbliğat-təşviqat kampaniyası dövründə kütləvi tədbirlərin və görüşlərin yalnız bu məqsəd üçün ayrılmış yerlərdə keçirilməsinə nəzarət təmin edilməli, icazəsiz kütləvi tədbirlərin, görüşlərin, yürüşlərin digər bu kimi tədbirlərin qarşısının alınması təmin edilməli, vətəndaşların müraciətlərinə, şikayət və təkliflərinə diqqət və qayğı ilə yanaşılması təmin edilməli, yaşayış yerlərində keçirilən səyyar qəbulların intensivliyi artırılmalı, vətəndaşlar tərəfindən qaldırılan məsələlərin icrası nəzarətə götürülməli, əhalinin elektrik enerjisi, lift təsərrüfatı, istiliklə, təbii qaz və içməli su ilə etibarlı və fasiləsiz təminatı üçün tədbirlər görülməlidir.