Azərbaycan iqlim dəyişikliyi ilə qətiyyətlə mübarizə aparır VİDEO
Digərləri 06 Mar 2018 15:55:00 192 0
Azərbaycanda ekoloji tarazlığın pozulmasına səbəb olan karbon dioksid (CO2) istixana qazı emissiyalarının əsas mənbəyi enerji istehsalı və istehlakı sektorları ilə bağlıdır. CO2 emissiyaları yanacağın yandırılması, o cümlədən, enerji istehsalı zamanı yanacaq materiallarının yandırılması, neft və qaz hasilatı, daşınma və mənzil təsərrüfatı kimi enerji tutumlu istehlak sektorlarında baş verir.
BMT-nin İnkişaf Proqramı və Azərbaycan Dövlət Neft Şirkəti (ARDNŞ) Azərbaycanda karbon dioksid emissiyasının qarşısının alınması məqsədi ilə 2015-ci ildən bəri silsilə tədbirər həyata keçirir. Belə ki, birgə fəaliyyətlərin nəticəsində ümumi sahəsi 10 min kv.m olan inzibati ərazi enerji baxımından səmərəli avadanlıq və ekoloji ləvazimatlarla, o cümlədən, enerji səmərəli pəncərələr, döşəmə istilik sistemi, havalandırma və istilik izolyasiyası sistemi ilə təchiz edilib. Bu binalardan hər il ümumi hesabla 2500 nəfər insanın bəhrələnəcəyi gözlənilir. Eyni zamanda yanacaq sərfiyyatında 10-15% qənaət etməyə imkan yaradan təhlükəsiz və enerji səmərəli nəqliyyat vasitələri Bakıya gətirilərək ildə 1200-ə qədər sürücüyə nəqliyyat vasitələrinin ekoloji cəhətdən səmərəli idarə olunması sahəsində təlimlər keçiriləcəkdir. Bundan əlavə, Siyəzən rayonun 12-yə yaxın kəndində 2500 nəfər əhalinin yaşadığı təxminən 600 ev təsərrüfatı təmiz qazla təmin ediləcəkdir.
Bütün bunlar hal-hazırda Global İqlim Fondunun (GEF) maliyyə dəstəyi ilə həyata keçirilən Azərbaycanda yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planları (NAMA) çərçivəsində aparılır və 2020-ci ilə qədər davam edəcəkdir.
Bu gün ARDNŞ-də birgə fəaliyyətin nəticələri, görülən işlər və gələcək perspektivlərin müzakirəsinə həsr olunmuş konfrans təşkil edilib. Konfransda həmçinin, BMT-nin İnkişaf Proqramının ARDNŞ ilə həyata keçirdiyi pilot fəaliyyətlərinin uğur nümunələrinin respublika miqyasında geniş tədbiq olunmasınn vacibliyi bir daha vurğulanıb.