"Aclıq bilirsiniz nədir? Heç hiss etmisinizmi? Bax, mən onu yaşamışam"


Digərləri 04 Mar 2018 23:08:00 314 0

"Aclıq bilirsiniz nədir? Heç hiss etmisinizmi? Bax, mən onu yaşamışam"

Vəsilənin bu həyatda bəxti gətirməsə də, ümidini üzməyib

Xoşbəxtlik nisbi anlayışdır. Hər kəsin hiss etdiyi xoşbəxtlik də fərqlidir. Kimi üçün var-dövlət, kimi üçün sevgi-ailə, kimi üçün doyunca yeməkdir xoşbəxtlik. Onun üçün isə xoşbəxtlik rahat yataq və sakit həyat sürməkdir. Bu, nə qədər çətin olsa belə...

Bu dəfəki qəhrəmanımız Vəsilə İsayevanın 37 yaşı var. Bacısı ilə birlikdə sığınacaqda yaşayır. Onunla elə məskunlaşdığı sığınacaqda həmsöhbət oluruq. Başına gələnləri imtahan olaraq görən bu qadın deyir ki, hər kəsin həyatda bir sınağı var. Bu yaşadıqları da onun sınağıdır.

Son.az Sputnik Azərbaycan-a istinadən bildirir ki, Vəsilə əslən Qəbələ rayonundan olduğunu bildirir. Deyir ki, atası 3 il öncə dünyasını dəyişib. Ailədə 4 bacı, bir qardaş olsalar da, qardaşı 20 ildir ki, yataq xəstəsidir.

Vəsilə ailə həyatı qurmayıb. Düşünür ki, bəlkə də onun üçün xeyirlisi elə budur. Bəlkə də, Allah onun üçün belə həyatı məsləhət buyurub.

"Qəbələdə dolana bilmirdik. Yemək tapmırdım yeməyə. Aclıq bilirsiniz nədir? Heç hiss etmisinizmi? Acsınız, yeməyə heç nəyiniz yoxdur? Əlinizdən də heç nə gəlmir. Bax, mən onu yaşamışam. Anam dedi ki, get Bakıya, bəlkə ac qalmadın. Biz də iki bacı Bakıya gəldik, sığınma evinə pənah gətirdik. İndi, heç olmasa, normal yemək yeyirik", - deyə o, Bakıya necə gəldiyini danışır.

Vüsalə deyir ki, ailədə 4 bacı olsalar da, heç biri ailə həyatı qurmayıb: "Əmimin gəlini istəyirdi ki, bizi Dubaya, Türkiyəyə aparsın. Dəfələrlə bizə gəlirdi, anamı dilə tutmağa çalışırdı ki, "ver, qızları aparım, Dubayda, Türkiyədə ərə verim". Anam sadə qadın olsa da, bizi vermədi. Həmin vaxtdan əmimgillə ədavətimiz düşdü. O vaxtlar mənim 21 yaşım var idi. Bacılarım da gənc idi. Mən evin sonbeşiyiyəm".