Bakı şəhəri üzrə Təhsil İdarəsi I sinfə qəbulla bağlı valideynlərə müraciət edib
Sosial 23 Fev 2018 16:44:05 281 0
Məhəbbət Vəliyeva: "Əgər hər hansı problemlərlə qarşılaşan valideynlər varsa, əvvəlcə alternativ komissiyalara müraciət etsinlər"
"Report" xəbər verir ki, o, jurnalistlərə açıqlamasında bu günlərdə idarəyə elektron ərizə qəbulunda problemlərlə bağlı müraciətlərin daxil olduğunu deyib.
M.Vəliyeva bildirib ki, bütün müraciətlərə çevik şəkildə cavab verilir: "Bəzən müraciətlərin həllindən razı qalmayan valideynlər olur. Bu valideynlər sıxlıq yerlərdə ərazi prinsipi tətbiq edilən məktəblərə öz uşaqlarını qəbul etdirə bilmirlər. Bakı şəhəri üzrə 31 məktəbdə yer sayı ərizə sayından daha azdır. Bu səbəbdən də ərazi prinsipi tətbiq olunub. Hansısa texniki problemlərlə qarşılaşan valideynlər də olur, onlara da köməklik edilir. Əgər hər hansı problemlərlə qarşılaşan valideynlər varsa, əvvəlcə alternativ komissiyalara müraciət etsinlər, problem öz həllini tapmadıqda Bakı şəhəri üzrə Təhsil İdarəsinə müraciət edə bilərlər. Onların müraciətlərinə çevik şəkildə cavab veriləcək".
O qeyd edib ki, bu il ərzində Bakı məktəblərinin birinci sinfinə, təxminən, 46 min uşağın qəbulu gözlənilir: "Bu tədris ili ərzində 6 yaşı tamam olan 24 min uşaq tədris ili ərzində məktəbəhazırlıq təlimlərinə cəlb olunub. Məktəbəhazırlıq təlimlərində iştirak edən uşaqlar avtomatik olaraq birinci sinifə qəbul olunublar. Həmin uşaqlar oxuduqları məktəbdə təlimlər keçdiyi müəllimlərin sinfinə yerləşdiriliblər. Bu uşaqların valideynləri yalnız axırıncı mərhələdən istifadə etməlidirlər. Yəni uşaqların ərizələrini çap edib məktəbə sənədləri təqdim etməlidirlər".