Smartfon istehsalı azalıb
Digərləri 08 Fev 2018 08:11:00 320 0
"Counterpoint Technology Market Research" analitik şirkətinin məlumatına əsasən, 2017-ci ildə dünya bazarına 1,55 milyarddan çox smartfon tədarük olunub. Smartfon tədarüklərinin illik həcminin 2% artmasına baxmayaraq, analitiklər qeyd edirlər ki, ilin son rübündə bazarda ilk dəfə azalma qeydə alınıb. Smartfonların rüblük tədarük həcmi 5% azalaraq 415 milyon təşkil edib.
Son.az ICTnews-a istinadən bildirir ki, 2017-ci ilin oktyabr-dekabr aylarında yalnız Yaxın Şərq və Afrika ölkələrində, həmçinin Hindistanda ikirəqəmli artım müşahidə edilib. Ancaq Çin və Avropada smartfon tədarüklərinin azalması mənfi dinamikanın səbəbi olub.
Ötən ilin son rübü brendlər üçün uğursuz olub. İlk dəfə aparıcı 10 smartfon istehsalçısından 7-də azalma qeyd alınıb. Yalnız 3 şirkət - "Xiaomi", "Oppo" və "Vivo" tədarük həcmini artırmağa nail olub. Çin şirkətlərinin uğuru əsasən, onların ölkə daxilindən kənarda yerləşən bazarlardakı mövqelərinin möhkəmlənməsi nəticəsində mümkün olub.
"IDC" analitikləri kimi "Counterpoint" şirkətinin ekspertləri də 2017-ci ilin oktyabr-dekabrında smartfon bazarında birinciliyi "Apple" şirkətinə veriblər. "iPhone" smartfonlarının tədarük həcminin 1% azalmasına baxmayaraq, bu, "Samsung" şirkətini ötmək üçün kifayət edib. İkinci yerdə qərarlaşmış "Samsung" şirkətinin göstəricisi 5% azalıb.