Lerik rayonuna yağan güclü qar problemlər yaradıb.

“Report”un Cənub bürosu xəbər verir ki, nəticədə rayonun Orand kəndinə yağan güclü qarın ağırlığına tab gətirməyən elektrik naqilləri qırılıb.

Kənd sakinlərinin verdiyi məlumata görə, bu səbəbdən kəndə verilən elektrik enerjisi kəsilib. Hava şəraiti imkan vermədiyindən, bərpa işləri sabah aparılacaq.

Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, Lerikdə qar örtüyünün hündürlüyü 26 sm çatıb.

Ümumilikdə cənub bölgəsində qarlı və şaxtalı hava davam edir.