Azərbaycan AŞPAnı Ermənistanın beynəlxalq humanitar hüququ pozmasına xüsusi diqqət yetirməyə çağırdı


Siyasət 26 Yan 2018 08:17:00 297 0

Azərbaycan AŞPAnı Ermənistanın beynəlxalq humanitar hüququ pozmasına xüsusi diqqət yetirməyə çağırdı

Silahlı münaqişələr zamanı istənilən hərəkətlər mülki şəxslərə qarşı deyil, kombatantlara qarşı yönəlməlidir.

Son.az Trend-ə istinadən bildirir ki, bunu Milli Məclisin deputatı Vüsal Hüseynov AŞPA-nın qış sessiyasında deyib.

"Beynəlxalq humanitar hüququn əsas prinsiplərindən biri kombatatntlar və mülki şəxslər arasında sərhəddin müəyyən edilməsidir. Təəssüf ki, biz bir çox hallarda mülki şəxslərə qarşı qəsdən törədilmiş hücumların şahidi oluruq. Bununla əlaqədar bir misal gətirmək istəyirəm: ötən ilin yayında Ermənistan Silahlı Qüvvələri tərəfindən Azərbaycan ərazisinə qəsdən açılmış atəş nəticəsində iki yaşlı Zəhra Quliyeva və onun nənəsi həlak olub. Bunun Ermənistanın öz üzərinə götürdüyü bütün beynəlxalq öhdəliklərə zidd olmasına baxmayaraq, məsələ ilə bağlı araşdırma aparılmayıb və bu cinayəti törədənlər dindirilməyib",-deyə o xatırladıb.

Deputat xatırladıb ki, AŞPA-nın dünənki sessiyasında Ermənistan prezidenti Azərbaycanın işğal olunmuş ərazisi olan Xocalıda mülki şəxslərin qətlə yetirilməsində şəxsən iştirak etdiyini etiraf edib və bununla da bu aktın soyqırım olduğunu bir daha təsdiqləyib.

"Bu cür müzakirələrdə iştirak edərəkən yalnız sözlərlə kifayətlənib, cinayətkarların əsl simasını onların tutduğu vəzifələrdən asılırı olmayaraq ifşa etməməklə biz insanlar arasında nüfuzumuzu itiririk ",- deyə Vüsal Hüseynov bildirib.

Deputat vurğulayıb ki, uşaqlar silahlı münaqişələr zamanı əhalinin ən həssas qrupuna aiddir.

Qeyd edək ki, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun başçılıq etdiyi nümayəndə heyəti Avropa Şurası Parlament Assambleyasının qış sessiyasında iştirak etmək üçün Fransanın Strasburq şəhərinə gəlib.

Nümayəndə heyətinə Mədəniyyət komitəsinin sədri Rafael Hüseynov, deputatlardan Sahibə Qafarova, Sevinc Fətəliyeva, Qənirə Paşayeva, Ülviyyə Ağayeva, Sabir Hacıyev, Elşad Həsənov, Vüsal Hüseynov, Fazil Mustafa, Asim Mollazadə, Rövşən Rzayev daxildirlər.