Psixofizioloji gərginlikdən yoğrulmuş yeni səhnə təcəssümü - "Cəza" monotamaşasında yaradıcı heyət (müəllif - Tamara Vəliyeva, quruluşçu rejissor - Əməkdar İncəsənət Xadimi Mehriban Ələkbərzadə, ifaçı - Əməkdar Artist Kəmalə Hüseynova) seyrciləri üçün elə bir mənzərə yaradır ki, sanki uzun bir teleseriala baxırsan. Xoşbəxt və bədbəxt bir qadının hər iki anlamda tale mənzərəsi, onun simasında silsilə obrazlar, onların məram və məqsədləri, əxlaqi-sosial keyfiyyətləri, həyati davranış tərzləri, xarakterləri insanlığa - bəşəriyyətə münasibətləri göz önündə canlanır.

Bu psixofizioloji gərginlik mövzu və ideyası baxımından təkcə ölkəmiz üçün deyil, həm də bütün müasir dünyanın psixoloji ab-havasını əks etdirir. Belə təcəssüm məişət dramı səviyyəsindən sosial yüklü çox yüksək pilləyə sıçrayır ki, bununla da dramaturq məqsədi, tamaşanın ideyası qloballaşır və bütün mətnaltı mənaları ilə sekulyarlaşır.