Ukraynanın Xarkov sərhəd dəstəsinin əməkdaşları dövlət sərhədinin 200 metrliyində qanunsuz olaraq Rusiya ərazisinə keçmək istəyən dörd nəfərdən ibarət qrupu saxlayıb.

“Report” xəbər verir ki, bu barədə Ukrayna Dövlət Sərhəd Xidmətinin mətbuat xidməti məlumat yayıb.

Saxlanılanlardan ikisinin Gürcüstan, birinin isə Azərbaycan vətəndaşı olduğu bildirilir. Onları Ukrayna vətəndaşı müşayiət edib. Qanun pozuntusu qeydə alındıqdan sonra sözügedən şəxslər inzibati-prosessual sənədlərin tərtib olunması üçün sərhəd bölməsinə aparılıb.

Azərbaycan və Gürcüstan vətəndaşları barəsində Ukrayna dövlət sərhədlərinin qanunsuz olaraq keçilməsi və ya keçilməsinə cəhd maddəsi üzrə protokol tərtib olunub.