Son günlərdə bir sıra kütləvi informasiya vasitələrində SOCAR-ın Kompleks Qazma İşləri Tresti ilə bağlı bəzi  iddialar yayılıb. İşə qəbul prosesində uyğunsuzluqlar, əməliyyat xərclərinin şişirdilməsi və s. haqqında qaldırılan həmin iddialarla bağlı “Report” informasiya agentliyi daha dəqiq və müfəssəl məlumat əldə etmək üçün SOCAR-a müraciət edib.

SOCAR-dan bildirilib ki, şirkətdə korporativ standartlardan kənarlaşma ehtimalı olan struktur çərçivələri və davranışlarla bağlı daimi araşdırmalar aparılır, şirkətin nüfuz və mənafeyinə ziyan vura bilən özbaşınalıq və qayda pozuntuları haqqında alınmış bütün siqnallar ciddi şəkildə yoxlanılır. Məhz bu səbəbdəndir ki, hələ 2012-ci ildə, şirkətin müasir korporativ fəaliyyət tərzinə keçid prosesinin bir hissəsi olaraq, SOCAR-ın daxili antikorrupsiya siyasəti qəbul olunmuş və onun həyata keçirilməsi üçün Risklərin İdarəedilmə Komitəsi yaradılmış, nüfuzlu beynəlxalq məsləhətçi şirkətlərin cəlb edilməsi ilə praktiki mexanizmlər müəyyən edilmişdir. Bu tədbirlər çərçivəsində şirkət üzrə vahid qaynar xətt yaradılmışdır. SOCAR-ın rəsmi veb saytı, e-mail və digər əlaqə vasitələri ilə əməkdaşlarımız, eləcə də başqa maraqlı şəxslər müşahidə etdikləri qanunsuzluq, korrupsiya və buna bənzər hallarla bağlı anonim və ya açıq formada məlumatlarını araşdırılmaq üçün göndərə bilirlər və daxil olan müraciətlər yaradılmış xüsusi komissiya tərəfindən araşdırılır.

Hazırda mətbuatda müzakirə olunan məsələlər müvafiq yoxlama zamanı şirkət daxilində araşdırılmış, yekun nəticələr əldə edilmişdir. Bununla bağlı bildiririk ki, 2017-ci il ərzində Kompleks Qazma İşləri Trestində (bundan sonra KQİT və ya Trest) Azərbaycan Respublikasının Əmək Məcəllləsinin 70-ci maddəsinin “b” bəndinə əsasən (işçilərin sayı və ştatların ixtisarı ilə əlaqədar olaraq), mətbuatda qeyd edilənlərdən fərqli olaraq, yalnız iki nəfər işdən azad edilib. Onlardan biri səhhətində problem olduğu üçün, əmək haqqının 5 misli məbləğində müavinət alaraq əmək müqaviləsinə xitam verilməsini özü istəmişdir. Digəri- Arif Qəmbərov isə ştat ixtisarı ilə əlaqədar ona təklif olunan müxtəlif vəzifələrdən imtina etmiş, Trest qarşısında qanunsuz şərtlər irəli sürmüş, ona edilən təkliflərdən bir neçə dəfə imtina etdiyi üçün, onunla bağlanmış əmək müqaviləsi, AR ƏM-nin tələblərinə ciddi əməl olunmaqla ləğv edilmişdir. Həmin şəxsin müvafiq məhkəməyə təqdim etdiyi iddia da, qanunsuz olduğu üçün rədd edilmişdir.

KQİT-nin fəaliyyəti ilə bağlı olan digər iddia isə əməliyyat xərclərinin şişirdilməsidir. Həmin iddia da artıq araşdırılmışdır. 1533, 1535, 1779, 37 saylı quyularla bağlı mətbuatda qeyd olunan məqamlar qarışıqdır və həqiqəti əks etdirmir. Belə ki,1533 saylı quyu 05.05.2008-ci il tarixdə, 1535 saylı quyu 28.12.2007-ci il tarixdə, 37 saylı quyu 04.03.2008-ci il tarixdə, 1779 saylı quyu isə hətta Trest yaranmamışdan xeylı əvvəl istismara təhvil verilmişdir. Beləliklə, aparılmış araşdırmalardan məlum olmuşdur ki, bu iddiaların bir qismi ümumiyyətlə trestin fəaliyyət dövrünə belə aid edilə bilməz. Quyular təhvil verildikdən sonra dəfələrlə audit yoxlamalarından keçib və bu yoxlamalar nəticəsində görülmüş işlərin səmərəsi ilə bağlı heç bir şübhə yaranmamışdır.

Qeyd edək ki, 2011-ci ildən etibarən SOCAR-da işə qəbul, yerdəyişmə, karyera yüksəlişi həmin il yaradılmış İnsan Resursları Departamenti tərəfindən tam şəffaf, obyektiv şəkildə, müsabiqə əsasında, mərkəzləşmiş qaydada həyata keçirilir. KQİT-də işləyən əməkdaşların səriştəliklərinə dair, o cümlədən KQİT rəhbərinin müşaviri ilə bağlı peşəkarlıq baxımından uyğunsuzluq iddiaları həmin Departamentdə araşdırılmış, bu iddiaların da həqiqətə uyğun olmadığı aşkar edilmişdir. Azərbaycan Neft və Sənaye İnstitutunu bitirmiş Ədalət İmaməliyev uzun illər qazma sahəsində rəhbər vəzifələrdə çalışmış və “Əməkdar Mühəndis” fəxri adına layiq görülmüşdür.

Ümumiyyətlə, qeyd olunmalıdır ki, SOCAR-ın antikorrupsiya siyasəti şirkətin korporativ mənafeyini qorumaq üçün nəzərdə tutulan mexanizmlərdən biridir. SOCAR korporativ hədəflərinə zidd olan davranışları aşkar edib, onların qarşısının almağı səmərəli fəaliyyətin təməl prinsiplərindən hesab edir. Bununla belə bu məqsəd üçün yaradılmış şikayət mexanizmləri insanlar tərəfindən bir çox hallarda öz aralarında olan şəxsi hesablaşmalar üçün sui-istifadə olunur. Bəzən şəxsi zəmində həmkarlarından razı olmayan şəxslər öz mənafeləri üçün şirkətin korporativ mənafeyini bəhanə gətirir, qaynar xəttə əsassız ittihamlar göndərirlər. Buna baxmayaraq, şirkətin korportaiv mənafeyini mütləq dəyər kimi əsas tutaraq, Risklərin İdarəedilməsi Komitəsi qaynar xətt vasitəsi ilə daxil olan bütün şikayət, irad və təklifləri bundan sonra da ciddi şəkildə araşdırmaqda davam edəcək, tutarlı dəlillərlə əsaslandırılan bütün ittihamlarla bağlı müvafiq tədbirlər görüləcəkdir.