Vüqar Namazov: "Bakı Fond Birjasının platforması dünyada ilk 4-lükdədir"
İqtisadiyyat 21 Dek 2017 10:47:41 315 0
BFB yeni törəmə maliyyə alətlərini tətbiq etməyə və xarici investorları Azərbaycan bazarına gətirməyə çalışır
“Report” xəbər verir ki, bunu Bakıda keçirilən “Kapital bazarları-2018” adlı tədbirdə “Bakı Fond Birjası” QSC-nin İdarə Heyətinin sədri Vüqar Namazov deyib.
Onun sözlərinə görə, BFB-nin platforması bazar iştirakçıları – emitentlərin və investorların tələblərinə tam cavab verir: “2016-cı ildə Cənubi Koreyadan olan mütəxəssislərin iştirakı ilə Birjanın platforması yenilənib və hazırda o, imkanlarına görə dünyada ilk 4-lükdədir. İndi əsas məqsədimiz bu platforma üzərindən biznesi canlandırmaqdır”.
V.Namazov onu da deyib ki, rəhbərlik etdiyi qurum yeni törəmə maliyyə alətlərini tətbiq etməyə və bununla da xarici investorları Azərbaycan bazarına gətirməyə çalışır: “Maliyyə xidmətlərinin inkişafına dair Strateji Yol Xəritəsində də nəzərdə tutulub ki, 2020-ci il qədər bazarın inkişafına dair bir sıra tədbirlər görülsün. Listinqin canlandırılması, şirkətlərin səhmlərinin ilkin tədavülə buraxılması prosesinin sürətləndirilməsi Birjanın inkişaf strategiyasında da nəzərdə tutulub”.