Azərbaycan Dünya Bankı qrupu və İnvestisiyalara Zəmanət üzrə Çoxtərəfli Agentliyi (MIGA) üçün çox əhəmiyyətli tərəfdaşdır. 

Bunu “Report”a eksklüziv açıqlamasında Dünya Bankı qrupunun icraçı vitse-prezidenti və MIGA-nın icraçı direktoru xanım Keyko Honda (Keiko Honda) deyib.

Onun sözlərinə görə, təmsil etdiyi qurum Trans Anadolu Boru Kəməri (TANAP) layihəsinə dəstəyini davam etdirəcək: “Dünya Bankı və MIGA-nın birlikdə dəstəklədiyi layihələrdən biri də TANAP layihəsidir. Dünya Bankının layihəyə ayırdığı kredit istifadə olunmaqdadır. Amma MIGA-nın ayırdığı zəmanətlə bağlı kommersiya bankları ilə danışıqlar davam edir. Bir daha təsdiq etmək istəyirəm ki, MIGA bu layihə qarşısında böyük öhdəliyə malikdir. Bakıya səfərim zamanı biz hökumətlə yardımçı ola biləcəyimiz digər sahələri də müzakirə etdik”.

Xatırladaq ki, 2016-cı ilin dekabrında MIGA-nın Direktolar Şurası TANAP layihəsinə ayrılan investisiyalar üzrə 1,2 mlrd. ABŞ dolları dəyərində zəmanət verilməsini təsdiq edib.