Redaksiyamıza müraciət edən Ülviyyənin yaxınları insanlardan mədət umurlar. Çünki məhz soydaşlarımızın köməyi ilə Ülviyyə bu müddət ərzində həyatda qala bilmişdir. O, hələ də böyük ümidlərlə möcüzənin baş verəcəyinə inanır.

Ülviyyənin anası Hicran xanımın sözlərinə görə, bu günə qədər keçirilən onlarla bahalı tibbi prosedurların pulunun hamısını soydaşlarımız ödəmişdir.

- Mən bütün soydaşlarımıza dərin minnətdarlığımı bildirirəm. "Facebook" da biz Ülviyyəyə dəstək ücün qrup yaratmışdıq. Qrupda Ülviyənin xəstəliyi haqqında yazılar paylaşdıq və tamamilə yad insanlar bizə kömək etmək ücün əllərindən gələni əsirgəmədilər. Eyni zamanda, bizə Ülviyyənin dostları, yaxınları, iş yoldaşları da böyük kömək göstərdilər. Odur ki, yenidən kömək ücün müraciət etməyə bir qədər çəkinsək, utansaq da, bizim başqa çıxış yolumuz yoxdur. Məsələ burasındadır ki, qızımın həyatda qalması ücün ehtiyatımızda yalnız bircə ay vaxtımız qalmışdır. Təcili sümük iliyinin köçürülməsi əməliyyatı tələb olunur... - Hicran xanım göz yaşları içində daınşır.

Ülviyyənin anasının sözlərinə görə, uzun müddətli müalicələrdən sonra Ülviyyənin sağlamlığında geri dönüş başlamışdır. Lakin bu sevinc çox uzun cəkmədi. Bir aydan sonra onun səhhətində ağırlaşmalar başladığından Ülviyyəni Türkiyəyə aparmağı qərara aldıq. Orada müayinələrdən keçdi və həkimlər kimya terapiyası təyin etsələr də, ilk kursdan sonra kimya terapiyasını dayandıraraq yeni, daha effektli preparatlarla müalicə etməyə qərar verdilər. Lakin Ülviyyənin vəziyyəti getdikcə ağırlaşdığından ona təcili olaraq sümük iliyi köçürülməsi əməliyyatı yazdılar. Hicran xanım qeyd edir ki, - Ülviyyənin bacısı donor kimi qəbul edilsə də, onun donor olub - ola bilməyəcəyi də sual altındadır. Uyğunluq analizlərinin nəticələri məlum olana qədər biz bu əməliyyat ücün pul tapmaqla məşgul oluruq. Lakin əgər uyğunluq analizlərinin nəticələri müsbət olmasa klinika özü donorlar bankından axtarışlar edəcəkdir. Bunun bizə neçəyə başa gələcəyini də bilmirik. Amma hələ də ümidimizi itirməmişik. Əməliyyata gəldikdə isə 118 min türk lirəsinə (30 min ABŞ dolları) başa gəlir. Vaxtımız həddindən çox azdır və əməliyyat mümkün qədər tez keçirilməlidir. Yoxsa Ülviyyəyə heç cür kömək edə bilməyəcəyik...