Ukrayna paytaxtı Kiyev şəhərindəki Kitab Evində tanınmış azərbaycanlı yazıçı Afaq Məsudun "Azadlıq" romanının təqdimatı keçirilib.

"Report"un Ukrayna bürosunun verdiyi məlumata görə, kitabın nəşri Ukrayna Yazıçılar Milli Birliyinin (UYMB) Kiyev təşkilatının beynəlxalq layihəsidir. Layihənin təşəbbüskarı yazıçı, ədəbiyyatşünas və UYMB-nin Kiyev təşkilatının rəhbəri Vladimir Danilenkodur.

Təqdimat mərasiminə Bakıdan romanın müəllifi Afaq Məsud da qatılıb.

V.Danilenkonun sözlərinə görə, Ukrayna nəşrinə leytmotivi insanın daxili azadlıq olmadan məhkum kimi olduğunu göstərən və azərbaycanlıların həyatı və məişəti barədə olan hekayələrin yer aldığı "Azadlıq" romanı daxil edilib.

Tədbirdə Ukrayna Azərbaycanlıları Birləşmiş Diasporunun (UABD) rəhbəri Hikmət Cavadov açılış nitqi ilə çıxış edib: "Kitabı görən kimi, məni onun adı maraqlandırdı. Axı azadlıq Ukrayna və Azərbaycan xalqlarını birləşdirən anlayışdır. Bu, onların hər gün uğrunda mübarizə apardıqları dəyərdir: Azərbaycan Dağlıq Qarabağda, Ukrayna isə ölkənin şərqində. Romanın ukraynalı oxucuların marağına səbəb olacağına əminəm, çünki burada ukraynalılar üçün müqəddəs anlayış olan azadlıqdan söhbət gedir".

Onun sözlərinə görə, UABD Azərbaycan mədəniyyətini Ukrayna dilində populyarlaşdıran layihələrə bundan sonra da dəstək verməyə davam edəcək.

Həmçinin Afaq Məsud ilə söhbət olub və o, təkcə romanı haqqında yox, həm də Azərbaycanda necə qəbul olunması barədə danışıb.

"Ukrayna auditoriyası yaradıcılığımı necə qəbul edəcəyi mənim üçün çox maraqlıdır. Çünki Azərbaycanda roman nəşr olunduqdan sonra xeyli müzakirəyə səbəb oldu", - Afaq Məsud bildirib.

Tədbirin qonaqları qarşısında bir sıra şərqşünaslar və Ukrayna-Azərbaycan əlaqələri üzrə ekspertlər, o cümlədən filologiya elmləri namizədi, Taras Şevçenko adına Kiyev Milli Universitetinin Filologiya İnstitutunun Türkologiya kafedrasının dosenti Zəminə Əliyeva, tarix elmləri doktoru, "Kiyev-Moqilya Akademiyası" Milli Universitetinin ümumi və slavyan dilçiliyi kafedrasının dosenti Fərhad Turanlı, Ukrayna Azərbaycanlı Gənclər Birliyinin rəhbəri İlham Allahverdiyev, Ukrayna Milli Aviasiya Universitetinin Beynəlxalq hüquq kafedrasının professoru, hüquqi elmlər doktoru Arif Quliyev çıxış ediblər.

Təqdimat Ukrayna Azərbaycanlıları Birləşmiş Diasporunun və Dnepropetrovsk Azərbaycanlıları Liqasının dəstəyi ilə baş tutub. Tədbirin informasiya tərəfdaşı "Report" informasiya agentliyi olub.