Son.az Trend-ə istinadən xəbər verir ki, bunu Milli Məclisin Mədəniyyət Komitəsinin sədri Rafael Hüseynov komitənin bu gün keçirilən iclasında çıxış edərkən bildirib.

Onun sözlərinə görə, belə halları Azərbaycan mətbuatında da görmək mümkündür: "Azərbaycanın hansısa böyük şəxsiyyətləri haqqında, dövlətçilik üçün əhəmiyyət daşıyan hansısa mühüm mövzular haqqında müzakirələr açılır. Şah İsmayıl Xətai, Babək, Qaçaq Nəbi, Nəriman Nərimanov və Azərbaycanın simvolu olan digər insanlarla, eyni zamanda milli dəyərlərimizlə - Novruz bayramı və s. bağlı müzakirələr aparılır. Bu mövzular ətrafında insanlarda ruh düşkünlüyü yaradılır, belə bir ovqat yaratmaq üçün iş aparılır. Bu məsələnin mahiyyətinə varmayan, dərininə getməyən, onun fəlsəfəsini dərk etməyən cavan, bir az təcrübəsiz qələm sahibləri də buna qoşulurlar. Ancaq bunun arxasında daha böyük siyasət dayanır. Bu, kənardan gələn, yeridilən bir siyasətdir. Fikirləşirsən ki, mən Babək, Şah İsmayıl Xətai, Koroğlu kimi dahi şəxsiyyətlərim var idi, onlara Azərbaycanın simvolları kimi baxırdım. Ancaq sən demə, mənim heç bir dəyərim yox imiş. Bunlar milli natamamlıq hissini formalaşdırmaq üçün düşünülmüş müəyyən ideyalardır".

R.Hüseynov bildirib ki, bu işi məqsədli şəkildə icra edənlər də var: "Amma təəssüflər olsun ki, bəzən bunu dərk etmədən də bu işə qoşulanlar "təsir agenti" olurlar. Bir var ki, insan məqsədli şəkildə "təsir agenti"nə çevrilir, bir də var ki, özü dərk etmədən "təsir agenti"nə çevrilir".